港姐大恐怖 克勤千嬅拒做嘉賓《2007年度香港小姐》於上週六（七月廿一日）出爐，3號張嘉兒無樣無身材，爆冷成為冠軍，全城噓爆。
明知今屆港姐無個靚，總決賽前夕，無線亡羊補牢，力邀當紅歌手任表演嘉賓壓場，先後與周杰倫、李克勤、古巨基、楊千嬅等十位歌手聯絡，但個個耍手擰頭唔願做，就連「無線契仔」李克勤，都以出碟做宣傳為由抗旨。至弊仲唔俾各路歌手上台唱自己作品，齋幫港姐做宣傳，當然無人肯制。
十星辭演
今屆港姐，燕瘦環肥樣貌平庸，事實大家有眼睇。無線於是急謀對策，決定搵當紅歌手助陣，充撐場面。初部計劃搵周杰倫加古巨基打頭陣演出，膽拖容祖兒加楊千嬅合唱，製造話題作壓軸。雖然想得周到，不過容祖兒聽到要同死敵楊千嬅合唱，即時斷然拒絕，寧願得罪無線。加上有關方面通知，歌手要唱大會指定歌曲，無得唱自己歌宣傳，其餘三位歌手亦相繼宣告辭演。
如意算盤打唔響，無線改向校長譚詠麟埋手，一心諗住搵埋克勤拍住上，左麟右李一定得米，不過身為契仔的克勤，得知無得宣傳新歌，亦劈炮唔撈；搵埋Eason 、軟硬同詹瑞文前後共十位藝人，通通無回音。苦無對策，最終無線搵林峯同徐子珊連同十位過氣港姐頂硬上，由於臨急抱佛腳，十位過氣港姐中，佘詩曼率先舉手辭演，焗住連當年無獎嗱，大住肚的歐陽妙芝都成為表演嘉賓之一。
扒后大方
今屆港姐在一片噓聲中結束。亞軍9號王君馨越戰越勇，連奪三獎；7號周美欣在泳衣及五強嗱最高分，實至名歸；至於3號張嘉兒爆冷成為冠軍，則成為千夫所指。賽後，司儀之一的曾志偉亦忍唔住開腔表態：「今年比較特別，以往我會貼三甲，但今年冇貼過，（3號張嘉兒）都幾冷，自己比較鍾意6號王卉霖。」
無樣無身材，一摘后冠的張嘉兒隨即被網友狠批腳粗、pizza 面，與九三年冠軍莫可欣不相伯仲。被外界彈到一文不值，溫哥華UBC 畢業的張嘉兒，卻相當淡定：「贏就係代表贏，成為評判心目中的冠軍最重要。」
險象環生
今屆港姐，無美貌、無身材，無線於是運用「聲東擊西」，落重本搭建華麗舞台，更安排四位港姐，包括1號麥皓兒、3號張嘉兒、5號鄭瑩瑩同7號周美欣大玩吊威呀爬牆，可惜眾人表演時雞手鴨腳，其中5號轉身返回地面時，一度跣腳，狀甚狼狽。
另一邊廂，身材出眾的12號李潔瑩，完成便服答問環節，返回後台時滑倒，美好身材表露無遺，總算為今屆沉悶的總決賽帶來丁點睇頭。
豬扒小姐
港姐一向標榜美貌與智慧並重，但人人叫好的靚女唔係年年有，歷屆港姐冠軍中，便有唔少成為香港人心目中的「豬扒小姐」。
1986
李美珊
擁有紐約大學生物系碩士銜頭的李美珊，加上能操五國語言，成為歷屆港姐中首位有智慧、無美貌冠軍。
1993
莫可欣
力壓大熱門郭可盈奪冠，莫可欣被千夫所指，至今依然是網友心中最醜港姐。
1995
楊婉儀
憑大方得體加上大學學歷奪冠，但楊婉儀被指似「凸眼金魚」，獲獎受質疑。
1998
向海嵐
雖以大熱姿態得獎，但近年美貌不復當年，也被界定為豬扒一族。
2005
葉翠翠
參選時雖被踢爆整容，葉翠翠依然奪冠，贏在口才了得，故獲獎後便被公司安排主持工作。
十位歌手拒任表演嘉賓，無線最終搵林峯同徐子珊頂上演出。
林峯、徐子珊缺乏號召力，大會臨時搵來十位過氣港姐撐場，其中佘詩曼拒做布景板，焗住搵當年無獎嗱，大住肚的歐陽妙芝（箭嘴）做嘉賓。
克勤：咁醜，咪搞！（設計對白）
千嬅：大家咁話！（設計對白）
楊千嬅和無線契仔李克勤先後辭演港姐嘉賓，唔肯幫豬扒港姐宣傳。（《忽然1周》圖片）
3號張嘉兒，腳粗，pizza 面，爆冷成為冠軍，連日來只有評判之一的朱玲玲力撐她是心水冠軍。
