藝人張繼聰（Louis）憑潮爆造型及爆笑演技在無綫劇集《老表，你好嘢！》中彈出，火速獲得觀眾認同，不過Louis笑言突破造型嚇得老婆謝安琪（Kay）提議分房瞓，連囝囝都唔畀面，寧願捧王菀之也不捧爹哋場。
Louis忙裏抽空出碟，準備舞出歡樂。
Louis在劇集中飾演潮人「宋為潮」，角色charm爆，Louis成功吸引大量街坊埋身：「出街嗰陣好多媽媽級街坊都會行埋嚟同我講：『潮潮，我好鍾意睇你做戲o架！你做得好好呀！』」
引得街坊勁冧，Louis感謝大家愛戴，不過他自爆角色討好有代價：「最辛苦係8月着住『姥姥龍』套道具衫，條街熱到一啲風都冇，行嗰陣條街有腳印，原因係啲汗滴晒落套衫腳位，成件道具衫濕晒，除件衫出嚟係咁滴水。」
Louis大爆老婆謝安琪因為角色造型太潮提議分房睡。
囝囝唔畀面
有苦自己知的Louis再爆慘事，原來角色「潮潮」不但令老婆Kay鬧爆他，更嚇到Kay建議分房睡：「老婆放工就算幾攰都會追我套劇，不過佢試過因為『潮潮』性格太衰，睇完就同我講：『咦……乜你份人咁o架，宋為潮！』又因為『潮潮』打扮太潮，佢睇完後笑住同我講：『唉！不如今晚你去隔籬房瞓啦，你啲造型太令人印象深刻喇，咁做夫妻唔係幾好呀！』」老婆要分房睡，連囝囝張瞻都唔畀面，Louis說：「佢每晚都淨係望住電視睇契媽王菀之，成日講：『之之姐姐好靚，幾時可以見佢呀？』邊得閒睇我！」
雖然拍劇人氣急升，但身為歌手的Louis已籌備出碟：「遲啲都要拍劇，不過會預時間趁空檔錄歌，希望喺下半年出一隻跳舞大碟，想帶出輕鬆開心嘅訊息。」
from:
http://orientaldaily.on.c ... /00282_041.html
