早排有人話俾媽咪姐知，見到張敬軒同關智斌（Kenny）蜜遊巴黎！本來媽咪姐都唔信佢哋一齊㗎，點知喺instagram見到軒仔upload咗好多法國靚相。事有湊巧，Kenny雖然冇交代自己身處何方，但都上載咗幾張遊埠相，背景同樣充滿法國風情。
其實Kenny為避開耳目，上個月27日獨自一人返港先。隔咗幾個鐘頭，軒仔就喺instagram呻，話自己一個人喺酒店食飯，時間上同Kenny完全脗合。
早幾日軒仔出席活動，媽咪姐打蛇隨棍上，問佢係咪同Kenny歐遊？佢無正面回答，不過嘴角含春叫媽咪姐自己問番Kenny喎。唏，問乜鬼吖，佢個樣春風滿面成咁，唔問都知答案啦！
軒仔同Kenny（紅圈）經常被影得出雙入對，關係像霧又像花，早前一度由密友變為普通朋友，如今一齊歐遊，似乎已經重修舊好。
作死你咩，咁高調！（設計對白）
Kenny擺咗張chok爆相上網，暗示自己喺法國左岸，軒仔就即刻留言笑佢係「阻掟」，連網友都笑佢哋成日公然打情罵俏咁話。
軒仔其後亦上載巴黎鐵塔嘅相，明顯同Kenny一樣身處法國。
歐遊咗一排，Kenny率先返港，「被留低」嘅軒仔表示得一個人食飯，言詞間似乎有啲寂寞。上月27日，Kenny一個人由法國返港，一落機即刻係咁㩒電話向軒仔報平安。其實咁痴纏，點解唔一齊返嚟香港呢？
