曾在澳洲生活的陳豪帶楊怡到Bondi 海灘一帶附近遊覽，更扮鬼扮馬影相留念。
《溏心風暴之家好月圓》上週高開36點，劇集收得，楊怡更憑住「嗱女」角色，取代廖碧兒，成為陳豪新任搲銀情侶拍檔，大量商場騷、登台和大陸剪綵陸續有來，進賬超過六位數字。
上週五（九月五日），陳豪、楊怡「孖咇」到澳洲悉尼為《家》劇宣傳，在當地生活過一段時間的阿卡（陳豪），更一盡地主之誼，帶嗱女四圍玩，有錢收有得玩，雙贏！
陳豪帶楊怡到讀書時常去的Balmoral 吃一頓豐富的早餐。
當地影迷為8月30日生日的楊怡補祝生日，令她澳洲之行特別難忘。
陳豪同廖碧兒曾是無線最賺錢的情侶檔藝人。
搲銀雙嬌
一直以來，陳豪、廖碧兒靠緋聞效應，登台剪綵外快愈搵愈多，要兩人「孖咇」現身出席活動，入場費叫價二十萬起，稱得上無線最搵錢情侶檔。但隨喺二人屢次傳出分手，廣告商對「情侶」的鍾愛程度亦相對大減。
至上月《溏心風暴之家好月圓》首播，劇集收視屢創佳績，阿卡同嗱女這對歡喜冤家，隨即被打造成新一代熒幕情侶；劇集播放至今，單是「孖咇」做商場騷已十個有多，連埋登台以及國內剪綵，陳豪、楊怡的荷包進賬六位數字。
拍攝《溏心風暴》時，已打算換車的楊怡，笑言係時候的起心肝「做嘢」。「車，我一直都想換，不過一路都無時間，宣傳期過後，我會出去睇吓有咩心水。」
至於被楊怡笑稱是「有米豪」的陳豪，對於劇集高收搵個盆滿
滿，最大心願是買千萬獨立屋。「距離我要買嘅海景dream house 夢想唔係差好遠，不過現階段我都係抱觀望態度，唔會心急入市，都係睇定啲好！」劇中熱愛「揸沽」炒股票，陳豪睇樓市一樣精明。
陳豪同楊怡以情侶檔為《家好月圓》舉行簽唱會，場面群情洶湧。
帶隊觀光
搲銀、宣傳一浪接一浪，上週五（九月五日），阿卡同嗱女這對新興熒幕情侶，飛到澳洲悉尼為《家》劇做宣傳。曾在澳洲生活的陳豪，拍晒心口做導遊，安排好行程同楊怡玩盡澳洲，唯一未能兌現下廚的承諾。「我一早諗定請楊怡去我澳洲間屋，煮我最拿手嘅牛扒俾佢試，不過太過匆忙，去到先知我唔記得帶屋企鎖匙。」
短短三日，通告排得密麻麻，陳豪依然抽時間帶楊怡到Balmoral ，一嘗當地一間餐廳的美味早餐，之後再到有名的Bondi 海灘和悉尼歌劇院睇風景。
除了吃喝玩樂，此行令楊怡覺得最難忘，是當地一班影迷為她補祝生日。「佢哋知道我會去澳洲宣傳，班影迷就約定同我慶祝生日，雖然過咗好耐（八月三十日），不過佢哋好有心，當晚亦過得好愉快。」
陳豪帶楊怡到跳蚤市場shopping ，楊怡對手上的古董手袋愛不釋手，而陳豪則鍾情特產羊毛靴，試個不停。
