金牌老闆黃柏高（Paco ）一聲令下，旗下歌星全體杯葛上週三（26日）舉行的新城勁爆頒獎禮，氣燄贏晒！
金牌一哥古巨基唔到，頒獎禮焦點落在第一次嗱「勁爆男歌手」兼「年度歌曲大獎」的張敬軒身上。
軒仔攝位騎住上，據知古巨基因此向老闆Paco 施壓，講到明在餘下3個頒獎禮中，「唔可以輸畀張敬軒！」
基仔出到聲要Paco 「做嘢」，軒仔要繼續掃獎，似乎有難度
！
今年快馬加鞭嘅張敬軒終在新城勁爆頒獎禮中，憑〈我的天〉勇奪年度歌曲大獎，愈戰愈勇軒仔當然high 上天，在慶功宴中更風騷話：「證明呢幾年嘅努力得到回報，終於守得雲開見月明。」
基仔拍枱
軒仔眉飛色舞，古巨基原本響Boxing Day 當晚都有四個獎做禮物，但據知基仔對Paco 杯葛新城冇得現身嗱獎已經不滿，在餘下的頒獎禮中更不容有失。據知情者說：「基仔當晚專程搵Paco 講數，輸畀陳奕迅就話啫，輸畀軒仔佢就一定唔得！佢同Paco 講之後啲頒獎禮唔想再輸畀張敬軒，加上Paco 心知今年頒獎禮都係靠基仔食糊，點都要盡最後努力啦！」
就基仔出口術一事，Paco 上週六（29日）對本刊說：「所有都係外界揣測啫！佢哋個個都好支持我嘅決定，基仔唔會唔開心嘅！（要你同佢爭取獎項喎！）冇啲咁嘅事！我成個禮拜冇見過佢。」而俾基仔壓扁的張敬軒就話：「我諗頒獎禮唔會咁兒戲嘅！跟住落嚟嘅男歌手獎，畀我都唔敢嗱啦！我只得幾隻歌hit ，虛火嚟啫！佢（基仔）響樂壇10幾年，我只係得5年，應該冇咁快嗱到嘅！」以退為進，軒仔青出於藍啦！
衛蘭食到中毒？
除咗金牌全體缺席外，黎明揸弗的A Music 旗下衛蘭一樣玩失蹤，似乎唔多恨嗱豬肉獎，賴低細孖衛詩一個撐場面，話就話食物中毒，但據知新城頒獎禮當晚，衛蘭同一班朋友相約打邊爐，可能因為鍾意對住肥牛多過啲豬肉獎，所以臨時打電話畀公司話自己食物中毒去唔到。不過A Music 發言人就撐到行話：「下晝佢都有去化妝，傍晚開始又屙又嘔，同事陪佢睇完醫生，點會出去打邊爐呀！」
個獎畀我都唔敢嗱！真實對白
Win 盡新城頒獎禮嘅張敬軒慶功宴上風騷，不過對叱吒男歌手獎，佢就好謙虛話：「我未夠資格！」
將基仔由大陸執番嚟嘅Paco ，一向對基仔寵愛有加，如今愛將疲勞轟炸要爭獎，Paco 當然要做嘢。
我點會輸畀你！設計對白
雖因公司問題冇到嗱獎嘅古巨基仍在頒獎禮上取得四個獎，新城高層仲話會搵人親自送獎畀基仔，都算係咁喇！《忽然1周》圖片
金牌失場，環球歌手嗱晒頭尾彩，（右起）張敬軒、孫耀威、謝安琪都已經橫掃新城近10個獎。
