「一場歡喜一場空」是一班堅守在亞視的藝員心聲。前日愚人節中午，亞視終於等到「白武士」出現，由德勤宣佈亞視與準買家簽署買賣合約，5小時後，由商務及經濟發展局局長蘇錦樑宣告亞視「死期」，提供免費廣播至明年4月1日為止。亞視藝員走過高山低谷，無奈接受亞視不被續牌的事實，40多名藝員被迫執包袱，袁潔儀指如無電視台接收便隱居田園，返鄉下耕田；富家子涂諾準備8位數投資製作公司，將優先聘用舊同事；秦啟維8月約滿，全身投入耳機生意；「六合彩之女」周嘉莉滿約後得冼國林賞識力邀加盟其公司。蔡國威和張家瑩感覺前路茫茫，未知去向。撰文：楊潔雯
袁潔儀於2002年被亞視拋棄，2014年再重投亞視懷抱，潔儀姐姐聞得亞視「末日」，她說：「第一個反應係好心痛！隔咗十幾年返亞視，有部份年輕下一代加入，又有舊一輩，感覺真係好開心，返亞視一年左右，係好一家人嘅心態，諗到再冇得做一家人咪好心痛囉！都要去面對，為屋企嘅已經走咗，未離職應該有自己嘅打算，我都唔例外。」
袁潔儀有感亞視猶如一個大家庭。
享受自給自足
潔儀姐姐熱愛幕前工作，她說：「如果第二啲台唔要我，老公實要我㗎！返去幫老公手搞嚇啲生意囉！其中一樣係做有機肥料，等於返去耕田喇，都開心開始有機生活，自給自足，呢種生活好健康，可以做嚇運動；二來可以吸收嚇大自然，最重要係種出嚟嘅嘢，唔單止自己食，仲可以同人哋分享，甚至可以幫我老公將呢個有機生活大搞，咁就更加好囉！內地方面開始對呢樣嘢有認識，所以我都希望為我老公出一分力，陪佢去農地實地考察，見嚇啲農民。」
同是《六合彩》主持，周嘉莉獲冼國林邀加盟旗下，而蔡國威卻前路茫茫。
蔡國威等約滿 拒當義工
「六合彩之子」蔡國威留守亞視22年從未間斷，經歷過風風雨雨，他一直盼望明天會更好，估不到他要親眼目睹亞視的終結，一時間威仔未能夠完全接受，亦不知前路方向，他說：「我8月約滿，如果亞視可以運作到嗰一日，咪等到嗰日之後先至再算囉！所以我係未有打算，之後都唔敢諗，一日仲有約，我咩都唔可以做，但係一間公司冇資金運作，係唔會有人做咁耐義工，我都唔會，不過我會履行我嘅合約。」
周嘉莉獲冼國林賞識
至於「六合彩之女」周嘉莉上月30日約滿，她被自然流失，對亞視仍無怨言，參加亞姐後加入亞視3年，周嘉莉慶幸亞視給她機會主持《六合彩》，令她學識「執生」，從而得到製作人的賞識。周嘉莉約滿前，義借亞視600萬出糧的冼國林主動聯絡周嘉莉，她說：「好開心，冼師傅真係好好，畀呢個機會我，大家好有誠意傾緊細節，我自己都希望可以喺呢行繼續發展，所以真係好開心冼師傅畀呢個機會我。」
【服務亞視3年】
富家子涂諾打算投資千萬開電影或演藝公司。
攝影：陳順禎
涂諾掟千萬 聘舊同事
塑膠貿易公司CEO涂諾，加入亞視為鍛鍊自己，亞視不獲續牌，他絲毫無損，在弱台3年，他學會演戲藝和製作，之後更打算大展拳腳，涂諾說：「自己屋企生意比較忙，呢幾年喺亞視用我好多時間，都想做番呢個圈，我諗應該會去搵一間中型的電影公司或者演藝公司合作，以一個老闆或股東身份參與，搵一家有規模製作團隊，希望如果香港有咩新公司有興趣增加股東，可以同我傾！」涂諾預算投資千萬入股，他表示新公司會優先取錄亞視員工，他說：「如果我有機會，我首選係曾經合作過嘅亞視同事，畢竟合作過，夾得到好難。」
【服務亞視20年】
秦啟維擔心無糧出，連長期服務金都無。
秦啟維轉行 銷售耳機
亞視是秦啟維第一份工，1995年演藝學院畢業後加入至今已經20年，他早前投資BASSBUDS耳機生意，不時需要資金周轉，所以他擔心亞視不續牌不會有糧出，連長期服務金都可能凍過水，他說：「咁多年儲埋落嚟，成20年有六位數字，加埋長期服務金，都擔心，等如成年人工。」
亞視如此境況，秦啟維只好全程投入耳機生意，他說：「我表哥拎咗個代理，最近推出咗一啲同英超球隊合作嘅耳筒和喇叭，分別係利物浦、熱刺、阿士東維拉同埋韋斯咸呢四個球隊，英國賣得幾好，希望引入來香港。」
【服務亞視7年】
張家瑩仍然在等亞視安排。
張家瑩失望 捱到年底
31歲的張家瑩是2007年亞姐冠軍，花了7年青春在亞視，結果令她失望和心痛，她說：「真係好想喊！究竟運作到幾時？我可以點做？我真係唔知道，我份約去到今年年底，真係好迷茫，呢份係我第一份工，真係有好多感情，唔知幾時冇節目做，幾時係最後一次，但係我好想再返公司，有機會可以做埋最後一個騷。」
年底才約滿，張家瑩未敢有任何打算，她說：「冇得plan，等亞視安排，睇嚇葉家寶點講。我自己做緊嘅餐廳梗係會繼續，冇嘢拍咪落去做打雜，乜嘢都做，如果有機會接出面做司儀，我都會繼續接。」
【話你知】全職藝人僅10多個
亞視不獲續牌，台前幕後700名「死士」中，除了以上袁潔儀、涂諾、秦啟維、蔡國威、周嘉莉及張家瑩6位藝人外，餘下擁全職合約的僅得數人，並且領月薪，當中劉錫賢在今年9月約滿、朱慧珊則預計10月約滿。
from:
http://hk.apple.nextmedia ... 150403/19099749
