本來出發去泰國，還是不去了，香港已經有離奇過小說的情節，不用再去親身感受荷李活戰爭片的氣氛。我選擇去台北。台北？台北點可能取代泰國？上引水產誠品書店士林夜市還是一間間毫無個性的酒店房？隨著五星級酒店文華東方整裝八年正式落戶，台北變了樣。酒店大戰一觸即發，W在夏日不斷搞池畔派對，你喜歡去曼谷玩到癲同時可以方便地住得好？台北從來不缺。現在，連布吉式的resort風情，在台北也終於找到。誰還敢說台北不能取代泰國？
只恨她們穿上太多衣服 W Taipei池畔派對，香港都有啦，使唔使專程去台北？感覺是完全不同啦。好啦，誠實少少，係見到的女仔完全不同啦。台北W喺今年暑假每個星期日下午將平時住客only的游泳池全面開放，俾$207入場費就可以玩足五粒鐘。派對正式展開之前一晚更請來模特兒行天橋示範水著，吸吸客。唓，台灣模特兒，咁當然係又靚又正啦！我一心以為去到正場，水平一定急速下滑。點知，去到日間派對第一炮，見到的台妹，質素一樣高企，最難得係日光日白兜頭望過去都質素高企喎。你知啦，喺香港夜場，唔去一去翠華拿取驗證，你係唔敢作出任何判斷的啊！最可惜係唔似澳門，人人跳落水飲乜都得，呢度嘅池畔派對，只可在池邊飲酒，搞到美女們下水意慾大減，連帶比堅尼出現指數亦嚴重低迷。而且，八點就散場，啱啱先日落咋喎，如果似我咁一個人去一個人走，都幾可憐。
我很誠實，不會盲目吹噓，大部分參與者穿長褲甚至著高踭鞋，氣氛實在不似澳門的池畔派對瘋狂。但至少有一個好處：池水不會混濁一片。
被攝的三位美女，左邊白衫的，有少少栢芝feel；中間灰衫的，似九成李心潔，當然不是坐在醫院一臉殘的那個樣。
夜晚的這個派對，請來台灣型男索女濕身撐場。去睇片啦，無乜嘢可以寫出來。
日間派對時，沒有模特兒了，仍然有模特兒質素的，只是肯穿上比堅尼的，實在偏少。
台灣人最愛支持本土，連DJ也不會選用外國來路貨，堅持起用年輕颱灣新秀。撐！
全場最吸引的，我首選這位女侍應。
入場費包一杯雞尾酒，強調加入本地食材。我推介最右的Lemon Aiyu，靈感取材自台灣特有的檸檬愛玉冰。
台北W飯店地址：台北市信義區忠孝東路5段10號交通：捷運市政府站電話：886-2-7703 8888網址：
http://www.wtaipei.com
陽光閃閃音樂祭地點：10樓池畔酒吧WET Bar& WET DECK日期：至8月31日，每逢週日下午三時至八時入場費：$210（包一杯雞尾酒）
短片仲有更多節目齋睇相感受唔到水花四濺配合強勁音樂有幾好玩？又或者想睇埋其他漏網靚仔靚女？拎部手機出嚟download「壹週Plus」，睇埋現場短片啦！
台北第一間超五星級華麗登場 文華東方文華啫，中環都有兩間啦，有幾大件事呀！對台北嚟講，真係好大件事。被稱為全台北第一間超五星級酒店，賣點係貴。最平的客房，一晚至少盛惠$4,342。因為夠大，最細的房間都有600呎，喺台北酒店界，史無前例，入到去，闊落感真係有啲似入住布吉或蘇豪的resort。而且夠豪，耗資65億改建而成，收你四千幾一晚，唔算過分。前身為具備歷史價值的中泰賓館，經翻新後，變成一座古色古香的十四層高建築物。都唔使改建八年啩！聽酒店員工解釋，原來老闆要求極高，一見有唔夠好的細節，即改，酒店開幕日期因此已經一改再改好幾次。正式開幕前一星期，部分房間的地板其實仍在更換中。使65億，差唔多啦。不過，最受歡迎嘅，始終係酒店入面嘅餐廳，五間食肆，當中以意大利菜餐廳Bencotto最具名氣，晚餐訂枱已經訂到七月，由米芝蓮三星級意大利廚Mario Cittadini主理，一道主菜竟然可以低見$200以下，嘩，你喺蘇豪的街邊店都未必得喎，難怪聽聞好多台北街坊無興趣住一晚，至少都要幫襯食一餐，睇睇真正的超五星級究竟是什麼一回事。
泳池極大，在台北市中心來說，絕無僅有，加埋綠化環境，真係似去咗度假區咁。
前身是有四十年歷史的中泰賓館，曾經是台北地標，05年七月起停業，經過八年的翻新工程，還好保留了建築物的歐陸風特色。
酒店共有六間餐廳，其中三間由名設計師季裕棠操刀，意菜餐廳Bencotto當然是其中之一。
La Carbonara$130，以酒店的名氣，加上米芝蓮三星廚，一客意粉買百幾，確係抵。
去泰國resort，做spa好緊要。來到文華東方，一樣係主打，一炮過推出六十幾項療程任你揀。這個「福爾摩沙」療程，用上台灣地道白泥配合台灣特有的刮痧手法，兩粒半鐘，$2,052。
最基本的客房，佔地都有600呎，有衣帽化妝間之外，仲特別注重客人私隱。想知點注重法？睇片啦！
台北文華東方飯店地址：台北市敦化北路158號交通：捷運南京東路站電話：886-2-2715 6888網址：
http://www.mandarinoriental.com/taipei
房價：$4,342起/晚
揭開兩大神秘服務收費咁高，服務當然要貼心，究竟台北的文華東方有乜嘢特別服務，令到模特兒Chelffy大聲力讚？拎部手機出嚟download「壹週Plus」，睇埋現場短片啦！
鬧市中的一點藝術綠洲 寒舍艾麗去曼谷，很多人會揀間好酒店，又要近市中心又要新淨仲要平；去台北，你只需要近捷運。情況開始改變了。嫌文華太貴族無法高攀？在信義區的新酒店寒舍艾麗，走簡約風格，派頭當然不及文華東方，但聰明地玩綠化，平台的小花園在高樓大廈密密麻麻的信義區，簡直是清泉一樣。話就話行簡約，又未至於零擺設的，反而放了很多藝術品。由地下入口的燈飾「狂風驟起」，到三樓大堂的樓梯，螢幕畫面的山水畫，甚至每間房的掛畫裝飾，全部有出處。以後，去台北，一樣可以似去曼谷咁搵到交通方便而唔會陳陳舊舊的酒店，長此下去，嗰堆殘殘舊舊有陣味的老式飯店，應該很快會被淘汰了。
酒店位於信義區，隔籬就係誠品書店，左右俾寫字樓大廈包圍，但依然闢地作花園區。
地下入口的燈，不只是燈，叫「狂風驟起」，以大量紙張size的燈光板組成，風一吹，會呈現不同光線。
以視頻形式呈現的藝術品，都有幾項，包括這個「極夜之晝」，融合攝影、錄像、裝置、繪畫。
五樓通往六樓的樓梯本身已經是藝術品，三折梯而中間無支撐點，建造難度甚高，從樓梯向下望，是另一藝術品「洞」，利用LED加鏡面反面製造出無限延伸空間感。
酒店房沒太大特別之處，但勝在夠方便，在部分房間更睇到台北101全貌。
寒舍艾麗酒店地址：台北市信義區松高路18號交通：捷運市政府站電話：886-2-6631 8000網址：
http://www.humblehousehotels.com
房價：$1,947起/晚
實用資料簽證：持特區護照須簽證，可於當地申請落地簽證，費用約$81。另可於出發前上網申請免費台證，可停留三十日。網址：
http://www.immigration.gov.tw
機票：長榮、港龍、中華航空等每天多班直航來回台北桃園機場。貨幣：港幣$1約兌新台幣$3.8
撰文：方俊傑攝影：陳家維 模特兒：Chelffy Yau
