筆者識好多朋友有鋪自駕遊癮，次次去旅行都要租部車喺當地玩兩、三日先過癮。不過，呢啲只係好入門嘅自駕遊，高階嘅就要好似四驅狂人Bobby咁由香港揸去英國！但話得高階，梗係唔適合初哥啦！點知呢個世界總有人挑戰難度！港人Albert未試過自駕遊，但一嚟就喺南歐葡萄牙出發，目的地直指香港！零自駕遊經驗、冇龐大支援隊伍，對汽車認識亦有限公司，結果畀佢揸部廿年車齡嘅Jeep Cherokee完成壯舉！
Albert呢部Jeep Cherokee係1995年版本，5速棍波，唔算係咩勁嘢，佢仲話整車錢貴過部車。
未認識Albert前，會因為有狂人Bobby為藍本，以為夠薑去玩高階自駕遊嘅人，都係好似Bobby咁嘅大大隻麻甩佬。點知世事冇絕對，Albert頭髮長長，行為動靜都陰柔過人，絕對想像唔到佢會一條友揸22,000km車歷險。Albert：「其實我出發前都用咗超過半年時間準備，主要睇Lonely Planet同旅遊blog搵景點，規劃好路線同埋搵咗partner。點知出發前先知partner唔識揸棍波車，結果我侷住揸足全程，partner負責support。」
狂人教路
四驅狂人Bobby係資深自駕遊專家，Albert今次旅程都有幫手教路。
唔好以為Albert係唔使做嘅二世祖，其實佢係納米科技研究員，由澳洲去葡萄牙做兩年合約工作，臨近期滿因利成便先決定由葡萄牙開始今次單程回港之旅。「其實大概一年前著手搞成件事，我當時乜都唔識，不過喺澳洲同香港都有車牌，去到葡萄牙公司再幫我整埋歐盟車牌，先有呢個念頭。之後我就上網搵相關資料，發現香港最出位玩自駕遊就係Bobby，而且佢早年都試過香港揸車到葡萄牙，所以我就主動聯絡佢，希望佢可以過料畀我。」結果Albert喺出發前得到Bobby教路各國車輛報關、過關方法，而且沿途多次遇上車輛機械問題，都越洋向Bobby發問。「當日我用1,500歐元（約$15,660）買呢部95年Jeep，喺當地用咗半年好地地，以為就咁起程就可以。點知部車全程出現好多小問題，搞到成日要問Bobby，一邊旅程、一邊整車，我計過呢個trip單係部車維修費都用咗2,200歐元（約$23,000），仲貴過部車！」
葡萄牙－香港
呢個開頭冚睇engine動作，Albert自言旅程中做過N次咁多！
喺歐洲揸車好方便，一個歐盟國車牌就可以行曬，就算去到俄羅斯，用香港國際車牌申請臨時牌照就得。
中國臨時入境牌可即時申請，上面寫明路線同期限，右邊就係Albert部車嘅歐盟牌簿，體積只係大過八達通少少。
呢張嘢原本貼喺擋風玻璃角落，唔好以為係行車證，其實係Albert喺西藏隨地執嘅平安符。
15國奇妙之旅Albert同一位唔識揸棍波車嘅partner喺今年3月22日先取道去葡萄牙境內、歐洲大陸最西點Cabo da Roca打個卡，然後正式開始旅程。由於今次旅程以體驗為主，所以每個地方都停留幾日，經西班牙再到人口只得7萬人嘅小國安道爾，之後再到法國，只係用咗2星期左右。但去到瑞士，就因為部車極力子有問題而放低喺德國維修近1個月！Albert當然唔會放過旅遊機會，1個月內多次遊歷瑞士、德國、奧地利及捷克，直到5月先到達東歐波蘭。「其實歐洲揸車真係好方便，進出歐盟成員國可以直行直過，係去到入境俄羅斯先要做啲手續。此外，歐洲路面普遍都靚，其他道路使用者亦有禮貌，唔似強國人咁冇規矩。」進入東歐地區後，基本上由立陶宛、拉脫維亞、俄羅斯、吉爾吉斯，以至近期因為排球美少女而大紅、位於中亞嘅哈薩克，都係前蘇聯地方。由於要等待約定一齊入中國嘅電單車旅客，所以東歐及中亞地區都花咗近1個月時間，至6月初先入中國新彊。由葡萄牙至中國，Albert共走勻15個國家，行足22,000km，都幾喪！
22/3歐洲大陸最西點Cabo da Roca，所有遊客都可以買張到此一遊證書。據Albert講佢由葡萄牙屋企出發去呢度都要一日時間，但由最西端出發回港，別具意義。
24/3 葡萄牙
對預言有興趣嘅朋友一定聽過「花地瑪預言」，Albert喺葡萄牙出發，當然要去花地瑪聖母大教堂參觀下。
葡萄牙佩納宮位於辛特拉（Sintra），算係歐洲最有特色同保存得最好嘅皇宮之一。
30/3 西班牙
旅程初段，已去到西班牙名勝Consuegra風車，小說唐吉訶德內瘋狂騎士就係誤當呢度啲風車係惡龍而亂劈一統。
文藝人就識唐吉訶德啫，一般人一定識西班牙足球班霸皇馬多啲啦！去到馬德里，冇波睇都去參觀嚇，球迷買精品都買到喪！
5/4 安道爾
Albert話其實安道爾好細，細到佢只係經過而冇停低，但風景都係靚到不得了。
安道爾屬於山境國，國內揸車時基本上全時間望到雪山。
7/4 法國去到法國，Albert主要係順道到波爾多探朋友，而部車個極力就喺法國開始出現問題，唔可以正常轉波。
12/4 德國整車期間搭車遊歷德國、瑞士同奧地利，喺德國弗萊貝格（Freiberg）城內小景，竟然有心思將小鴨公仔串成一條，喺乾淨水渠上隨水漂流。
[img]http://hk.tradingauto.nextmedia.com/images/next-photos/EasyFinder/1175/640pixfolder/X1175_017_E01_IMG_3271[2].jpg[/img]
16/4 瑞士Albert住咗喺瑞士朋友屋企兩星期，日日就係望住呢啲靚到無倫嘅休息滑雪場。
20/4 奧地利
奧地利皇宮花園亦都係迷宮花園，好多遊客喺度玩足一日都唔厭。
整好架車再出發去位於奧地利境內、個地方名超搞嘢嘅小鎮，Albert話當地其實冇乜嘢睇，係個地方名最出位。
21/4 捷克
捷克布拉格嘅Kutna Hora人骨教堂，據知係因為太多古人葬喺呢度，太多骨頭冇人認頭，所以用嚟裝飾教堂，咁都得？
捷克布拉格市內著名天文鐘大樓，經常吸引大量人抬頭對時間。
3/5 波蘭Albert話去波蘭主要目的就係參觀估計有110萬人死喺裡面嘅奧斯威辛集中營，其實睇嘅時候心情都好沉重。
5/5 拉脫維亞拉脫維亞文字唔係個個識，但入境見到咁易明嘅路牌，外星人都睇得明啦！
5/5 立陶宛曾經係俄羅斯一部分嘅立陶宛有一座十字架山，傳聞係1831年反俄起義後開始一直累積，估計現時有超過50,000個。
6/5 俄羅斯Albert進入俄羅斯時撞啱抗戰紀念日，唔少地方都唔開放，紅牆都只係有限度開放。
16/5 哈薩克近日熱爆排球美女就係嚟自哈薩克，呢個中亞地方除咗係亞洲同歐洲交界外，仲有好多好有文藝氣色嘅紀念碑，呢個就紀念當地著名音樂家，只要有風吹過，就會好似號角咁發出響聲！
20/5 吉爾吉斯由於要喺吉爾吉斯等入中國團友，所以有長時間可以去山區體驗當地生活。
食住行從簡除咗plan行程之外，其實Albert百幾日嘅旅程都係好free flow。每個地方嘅酒店都係前一晚睇嚇行到邊，先上lonely planet同booking.com網站預約，由歐洲、俄羅斯到中國嘅酒店都可以搵齊，貴極都係100歐元，平起上嚟幾歐元一晚都有。而食就更加求其，行到邊食到邊，又或喺超市買定上車食。就算架車壞起上嚟都問題唔大，因為大型油站都會有維修服務，要整幾耐就喺當地玩幾耐！
由葡萄牙進入西班牙前，Albert同partner第一次試嚇野外開餐，點知大風到爐都差啲點唔著，最後雞手鴨腳搞半個鐘先食到個公仔麵。
繼德國修理好極力子問題之後，到奧地利前又出現4WD傳動軸問題，最後喺當地將4WD系統廢咗佢，全程2WD！
Albert全程都用汽車導航器，再加上partner手機Google Map輔助，本來一向冇事，但去到拉脫維亞唔知點解導航器失效，手機數據用盡，最後要預早download地圖，再用紙筆記錄路線。
行足22,000km都冇爆過胎？邊有咁好彩？去到吉爾吉斯就爆，而且仲要當時先發覺個千斤頂唔啱用！灰到震之際，又係得途人幫助，換好後備胎之後，入中國境再換新胎。
全程最麻煩入強國筆者問Albert全程最麻煩係乜嘢事，佢話喺歐洲揸車嘅麻煩嚟自自己部殘車，小問題一邊揸、一邊走出嚟，但入中國境就係地方帶嚟麻煩。「我用咗好多時間去計劃中國嘅行車路線，因為揸車入中國要申請好多批文，又規定要幫襯旅行社請導遊。所以我為咗慳錢，上網搵到打算揸電單車入中國旅遊嘅鬼佬夾份，約埋喺吉爾吉斯一齊入境，結果用咗兩萬人民幣就搞曬牌照揸車入中國。」據Albert講，強國唔只申請入境煩，連國內路面狀況都唔好，治安更加一般，試過喺四川跌落坑，都畀村民屈佢轆爛個石地要賠錢！好彩最後報公安擺平。此外，Albert喺7月10日到香港，亦話香港都係麻煩地之一，因左軚關係部車唔可以揸返嚟，而係拖返嚟。「其實世界上好多地方都可以左右軚車共存，我由葡萄牙開始一直揸車，部車會行會走，但偏偏到皇崗口岸就要搵過境拖車拖返去Bobby鋪頭，係美中不足。」
5/6 新彊
進入中國境第一個到嘅地方就係新彊，其實文化及建築物都同吉爾吉斯好似，大家都係信奉回教。
7/6 烏魯木齊
烏魯木齊仍有好多牧民，呢啲上百隻羊塞住路面情況時時都會出現。
Albert全個旅程最地獄嘅路段就係翻過天山前嘅勝利達阪！因為條路太爛，花6小時先行得80km路，全日不停行車17小時，凌晨2點到步後即瞓！
9/6 天山天山天池景點風景一流，得來不易呀。
11/6 吐魯番全個旅程最高溫地方就係吐魯番嘅火焰山，攝氏45度高溫！不過Albert話佢熱得嚟乾燥，好過香港天氣。
19/6 青海高原青海高原正正係黃河源頭，點可以唔到呢個孕育中華民族嘅重要地方。
25/6 西藏
西藏多僧人之外，好多廟宇都好靚，明顯僧人有好高地位。
天葬係藏區其中一種殮葬方法，Albert就全程目睹天葬過程，成個山頭都係巨型禿鷹等食！
1/7 四川由青海一路落山，就會到達四川，仲去埋探樂山大佛。
10/7 深圳返到皇崗，最大遺憾係要拖車入香港去境。
110日使8萬 Albert:學識整車
10/7返到香港後部車一直擺喺Bobby車房，最終都應該要劏。
花110日行22,000km、經15個國家、花近8萬港幣旅費，先由葡萄牙返到香港。Albert其實冇乜買手信返嚟，最好嘅一切都喺腦內，或者仲有大家𠵱家睇到嘅照片，仲有冇其他得著？「我覺得今次最大得著係對汽車認識深咗好多，以前只係識得揸車，根本冇諗過有一日自己落手簡單維修，完全係由旅程中自學。」筆者好有興趣知部車點處置？「我唔會返葡萄牙做嘢，所以呢部左軚車最終命運都係要劏。」陪伴走過咁多難忙路，唔會唔捨得咩？「唔捨得都冇辦法，我都會試嚇有冇其他辦法留住佢，始終佢都係旅程回憶一部分。」
撰文：袁國基攝影：葉偉豪、被訪者提供
