Banana Spin設計源自卡通《英勇強尼》，好似身在裝滿香蕉的大碗中，轉足兩三圈最後跌入中間的黑洞，頭都暈！
香港水上樂園開幕遙遙無期，玩水最好轉戰泰國。今年最矚目兼最期待，一定係泰國芭堤雅即將開幕的Cartoon Network Amazone主題水上樂園，全球只此一家！樂園集合《飛天小女警》、《Ben 10》及《探險時光》等招牌卡通設計佈置，面積達14公頃，有全亞洲最大的兒童滑水梯，大到似水上遊樂場，仲有首個多媒體滑水梯，邊滑邊睇投射聽音樂，唔好以為小學雞，部分遊戲激到大人都唔夠膽挑戰。今次率先預覽部分設施，有定心理準備濕身啦！
最激六條滑梯 又俯衝又跳樓Cartoon Network Amazone位於芭堤雅Bang Saray，離市中心約20分鐘車程，全園分成六個玩水區，另有水療中心、Beach Club、餐廳及零售店，區與區之間相隔唔算好遠，最激的玩意集中在圍繞《Ben 10》設計的Onmiverse Zone，共六條設計特別的滑水梯，適合大人或身高超過120釐米的青少年玩，玩完真係腳軟㗎！其中三條由全場最高點滑下，平台高23米，可以飽覽全個樂園，行八層樓梯上到頂時，直情喘氣！Humungaslide為兩條平排的滑水梯，一個水泡坐兩人，然後同一時間滑下鬥快去到終點。因為有多個彎位，速度唔算快，經過漆黑一片的密封管道，都幾緊張。最好玩係衝上綠魔造型的的U形斜坡，一下強勁離心力再拋上去，似玩海盜船！至於全球首條多媒體滑水梯The Omnitrix，在球體內會有投射及音效。而長110米的Alien Attack!，會滑過三個小密室，最後經過一段如時光隧道咁cyber的螢光滑梯，歷時一分鐘才到達地面，聽落好過癮，可惜當日未能親身試玩。另外三條位於18米高的平台，冇咁高，反而仲驚嚇！最恐怖首選Goop Loop，玩者要先走入密封的火箭艙內，關上門約五六秒，失驚無神跌落去，如跳樓機般足足12米free fall，模特兒驚到打退堂鼓，唔及班細路咁勇！隔籬的XLR8則是全樂園最高速的滑梯，近乎垂直的滑水道，時速可高達50公里，幾秒就落到地面。Intergalactic Racers可以同時俾四人玩，最得人驚係頭向下，好似超人咁捉住膠氈滑下，一衝落去只覺水花撲面，眼同鼻都入曬水，合埋眼都感受到有幾快！挑戰曬呢六條，已經好叻！
Goop Loop就是這條滑梯嚇到模特兒花容失色，要被困在太空艙內數秒，見住逐個逐個被衝出去，都幾心寒。
由一條斜路及一個大彎位組成，全程密封，由頂落地不過數秒，未尖叫完已到地。
Intergalactic Racers話明是Racers，四人一齊玩當然要鬥快！體重愈重，速度愈快！
四條滑水梯並排，玩者要頭向下俯衝兼捉實膠氈，頭段最斜最激，水花打落塊面，其實咩都睇唔到！
Alien Attack！全長110米，滑足一分鐘。設計最花心思，有半密封管道、三個外星人造型的密室，最後一段的彩色管道，似去咗太空。
Humungaslide以奸角Humungousaur作設計，睇番比例就知弧度有幾勁，衝落水一刻真係有離心力。
The Omnitrix現時仍未開放，球體內裡會有投射及音效，好想試！
小朋友玩水迷城心血少，可以同小朋友去比較溫和的Cartoonival，這個全亞洲最大的水上遊樂場，適合2至13歲兒童，設計色彩繽紛，猶如迷宮般錯綜複雜，超過150個小玩意，包括九條滑水梯、小型黑洞、水槍、水桶及隧道等，亦有不少繩網及樓梯可以爬上爬落，盡情玩水！密封式滑水梯橫跨整個遊樂場，如打蛇餅般彎彎曲曲，有些更呈螺旋形，由頂層轉到地面，但唔算太斜，刺激度屬入門級，唔會嚇親小朋友。最頂的壞蛋角色Fourarms其實是容量達一千公升的大水桶，隨時如瀑布般兜頭淋！細心留意，遊樂場蘊藏《飛天小女警》、《阿甘妙世界》等多個可愛卡通人物，記得帶埋防水相機去影餐飽。遊樂場水深只及腳眼，想游水要到旁邊的人造浪池Megawave，感覺似澳門銀河但冇沙灘，面積超過三萬呎，可容納1,750人。人造浪來得幾密，愈深水浪愈大，最深去到兩米，直情有白頭浪，行兩步退一步，都營造到深海feel！遊客可以免費借用水泡在池內漂浮或曬嚇太陽，這裡同時亦是水上舞台的觀眾席，每日都有八場show睇，浸住水睇特技及歌舞表演，唔怕乾煎，爽！
最搶眼的Cartoonival正正位於Amazone中央，內藏大量玩水設施，小朋友見到一定興奮。
《飛天小女警》最為人熟悉，公仔在頂層，好難合照噃！
水槍全部在第二層，被人射都冇仇報，好陰險！
木桶底部漏水似花灑，想唔濕身都幾難。
小朋友要攻頂就要爬繩網、上樓梯，準備在此玩到筋疲力盡啦。
人造浪池算寬敞，到時後方將會有舞台，邊浮邊睇show，一定舒服過在岸上睇。
園內不時有卡通人物出來同你影相，包括《探險時光》的Jake及Finn。
笑面狗U形梯考膽識又要驚又要玩，可以到小兒科版Adventure Zone熱熱身，三條滑水梯適合夠勇的小朋友征服。必玩Banana Spin及Jake Jump，P.84的Banana Spin設計源自《英勇強尼》，要坐上二人水泡，在巨型水兜內轉幾圈，再跌入黑洞內，唔好彩倒後滑落，心跳立即加速。Jake Jump成條滑水梯係黃色老虎狗Jake嘜頭，遠睇勁可愛，同樣坐上二人水泡，經過幾條大斜坡再衝上U形滑梯，衝力比Humungaslide小，不過對小朋友來講算幾激。真係唔玩得，坐上水泡於長達335米的漂流河漂浮，由頭到尾都係平路，唔怕嚇破膽。仲有尚未完工的Surfarena，這部人工滑浪模擬器（Flowrider），在曼谷及布吉都有，不過至少要包場一小時。這裡每人試玩分半鐘，可選擇似滑板般的長板及適合初學者的短板，樂園更請來Flowrider亞洲冠軍Nazri任顧問，在場邊作指導，仲有DJ在場打碟，全場最型。場內仲有大量帳幕俾你relax的Cabana Republic、美食街及全球最大的Cartoon Network零售店，足夠玩一日。官方稱開幕日在年尾，現時只作試業，供受邀VIP及購買年票人士率先體驗，成人年票最平索價$1,680，唔多化算！建議唔使咁心急，等所有設施正式運作時先入場玩都唔遲。
Jake Jump雖然位於小朋友區，不過單睇斜度，其實都唔太小兒科！
香港人未必熟悉Cartoon Network的角色，Lady Rainicorn出自《探險時光》。
園內卡通人物塑像唔算多，《Ben 10》內的Rath比例足1比1，造型神似。
Riptide Rapids完全唔驚嚇的漂流河，頂多只有小花灑，最啱幼兒玩。
預告！樂園內有全球最大的Cartoon Network主題零售店，有別注版公仔發售。
人工滑浪模擬器Flowrider是新興X game玩意，技巧有點似玩滑板，講求平衡力。
芭堤雅住宿推介
Pullman Pattaya Hotel G獲TripAdvisor推薦，是芭堤雅少數擁有私人沙灘的酒店。房間設計簡約舒適，全部有向海露台，Executive Club Room面積約450呎，有免費Wi-Fi及可享用私人會所，Kid's Club設備完善及有不同活動，適合一家大細。地址：445/3 Wongamart Beach,Pattaya-Naklua Rd.,Soi 16,Pattaya,Chonburi 20150電話：+66 384 119 408房價：Deluxe Room$864起網址：
http://www.pullmanpattayahotelg.com
Cartoon Network Amazone地址：888 Moo 8,Najomtien,Sattahip,Chonburi電話：+66 38237707開放時間：10am-6pm入場費：成人$382，小童$286網址：
http://www.cartoonnetworkamazone.com
有用資料簽證：持特區護照及BN（O）均無需簽證機票：前往芭堤雅須於曼谷轉車前往，乘坐泰航每位$2,489。於23/8至30/9出發，可享二人同行優惠每位$1,140起。交通：可於曼谷機場乘坐機場巴士直達芭堤雅，需時約兩小時，如於曼谷市內，可乘BTS前往Ekkamai站到東部巴士站乘空調巴士，需時2.5小時。鳴謝：泰國政府旅遊局、泰國國際航空
撰文：張頌婷攝影：譚俊軒 模特兒：Katherine Wong@ Jamcastmailto:hotpot@nextmedia.com
