[問題討論] 中移動先苦後甜

中國移動(941)現兜兜出資400億元(人民幣．下同)入股浦發銀行20%，聲稱搞手機銀行，引來大行不滿，聯手發功出報告話佢「不務正業」。
貴為國企一哥，又坐擁逾兩千億元現金，除咗中移動，根本冇人食得落浦發咁大額嘅資本需求。唔通你叫10大持股中有6隻係金融股，兼已持有浦發嘅中國人壽(2628)，或者轉咗口味大舉入股新能源領域嘅中投出手咩，到時又會被人話市場化失敗，國進民退。
中移動有咁耐風流，成個3G計劃由阿媽畀錢，所以出嚟行係時候要還。股東鬧時鬧，唔好忘記當年阿媽投入千億元計搞3G網絡工程，上市公司唔使上身畀錢；??家入股浦發，係就係有啲九唔搭八，但浦發去年第三季仍有4.5%盈利增長，頭3季賺過百億元，不良貸款同不良貸款比率都玩「雙降」，只係資本充足率唔多夠，要中央出手。

入股浦發遲早有回報
上年已傳浦發會向香港股民伸手發H股，呢次中移動出手，資金壓力得以紓緩，又唔使抽資嚇怕市場，中央無非係為咗喺股指期貨出台之前，盡量減輕市場震盪。中移動呢次捱義氣，他日回歸A股，呢400億銀咪又係輕易攞番。呢個左手交右手嘅遊戲，心水咁清嘅讀者又點會唔明？大行狂質，除咗係嘈佢唔派高息借題發揮，業內人士話同美資行作風有關，因為佢哋分好一條條Team各負責不同領域，一旦公司轉型或買入新業務，分析員就會企咗喺度，唔識做估值，所以咁多年以來，和記黃埔(013)盤數唔係咁多行睇得通。
其實點叫「不務正業」，中移動若搞到個阿里巴巴(1688)咁成功嘅支付寶，難道對股東有害？要知道明日世界乃係手機世界，早着先機便利化手機支付程序，可以鼓勵用戶多透過網絡消費。年初海地地震，全球透過手機短訊就捐咗超過300萬美元畀國際紅十字會，公司宣傳同產品促銷都會係未來新趨勢。
中移動作為電訊大佬已經先天不足，冇iPhone、冇價格優勢，多元化發展係未來出路，睇怕「不務正業」嘅係大行分析員自己。

青心直說[胡孟青]