考評局最近出咗通識教育科嘅新課程題目同評分準則，話言之成理就可以及格。有線電視新聞台搵咗才子陶傑試做試卷，再交由三位任通識科老師批改，包括多年前同黃霑主持《江山如此多fun 》嘅鄧飛。為免影響評分，改卷嘅老師事前唔知「考生」身份，但結果出乎意料之外，才子竟然被評為通識唔及格。
經常喺專欄度顯示佢博古通今嘅陶傑今次應考嘅其中一條通識題目，係問溫總點解提出「低污染、高安全」嘅能源發展方向。陶傑答話中央要實踐科學發展觀嘅口號，又提到煤礦意外頻生，工人生命價值廉賤，煤礦成為「血煤」；但講到中國發展低污染能源嘅可行性有幾大，陶傑就指出溫總有好多政治考慮，連佢自己都用上「若有可能」、「盡量使用」等字眼，就知道溫總都覺得可能性好細。
鄧飛評分時認為，呢位考生識用「血煤」呢兩字，好叻，呢部份答得好精采，但答可行性嗰部份就屬於陰謀論，係揣摩推斷領導人嘅意思，有啲離題。結果，三個老師有兩個畀陶傑通識總分唔及格。陶傑就反駁話，連煲呔有時都唔明溫總講話嘅微言大意，你叫啲中學生點答呢等題目，仲話唔好理佢及唔及格，份卷本身就已經唔及格。
如果佢都唔合格,咁邊個可以合格??
片:
mms://uc4.i-cable.com/wsx ... d419fc7047c4a84
