草泥馬！玩老翻，不該！（普通話）
立法會禁講「Ｘ街」，但禁唔到毓民講「不該、poor guy 」。
老翻game 同粗口都一樣係禁唔晒，玩嘅方法仲愈整愈方便，其中Wii 就最poor ，硬破完之後有軟破，最新仲發展到直接由USB 手指load ISO ，連燒碟都慳番，十個不該！
近排NDSi 同PSP 都諗盡辦法抗老翻，可惜眼見成效都唔掂，game 廠完全係poor （可憐）guy ；班邪道玩家又唔poor （窮），都走去玩老翻，就真係poor guy （Ｘ街）！
USB Loader 係由外國黑客開發，連任天堂剛推出嘅4.0 firmware 都用到，裝咗後個load game 畫面就係咁。
裝USB Loader 都有一定難度，所以黑客擺埋片上YouTube 教人，極賤，你千祈咪學呀！
Wii 喺USB 裝置讀ISO
呢個最不該嘅玩Wii 老翻方法，係靠一個叫USB Loader 嘅軟件去執行，裝咗佢入已改機嘅Wii 後，就可以直讀所有USB device 入面嘅ISO ，即係唔只USB 手指，連經USB 接駁外置硬碟都得！從此邪道玩家再唔使買老翻碟，喺網上BT 完ISO ，經特定啲軟件抄入USB device ，就儲多多game 都得，load game 仲快過讀碟，方便程度猶如玩NDS 同PSP 嘅老翻，離晒罩！
香港game 站亦有人寫晒中文教程，但居然叫人買正版game 去整ISO ，虛偽都係不該！
升新firmware 會死機
好彩天有眼，呢個USB Loader 其實仲未完善，班玩家發現原來有好多ISO 抄入USB 手指後都玩唔到，亦唔係所有手指同硬碟都support ，試邊隻得都試到傻。同埋喺安裝USB Loader 嘅過程中，需要裝埋其他改機軟件，當日後老任出新版firmware 時，一升級就可能死機，咁鬼牙煙，千祈咪博呀，玩正版啦！
4 大主機邪道老翻近況
Wii 4.0 load SD gamePoor guy 度：95%
任天堂剛剛推出兼被破解埋嘅Wii 4.0 firmware ，都追加咗SD backup 功能，玩家能將機入面嘅正版virtual console game 同channel 抄落SD 咭，咁就可以慳番唔少記憶體，不過遊戲save 就要留番喺機入面。老任亦預告第時會俾人喺購物Channel 下載買正版Wii game ，可以直讀SD 咭load 嚟玩，若然再開放到所有USB device 都得嘅話，方便咗咁多，班友就少個藉口玩老翻啦！老任，諗得過喎！
Wii 剛於3 月25 日推出firmware4.0 ，支援SD 咭讀寫功能，但新firmware 就在3 月31 日被黑客破解埋，poor ！
NDSi 歐版機加密推出
Poor guy 度：90%
NDSi同Wii 一樣咁poor ，出機冇耐防線就俾AK2i 老翻咭擊破。老任為咗挽回面子，啱啱宣布決定喺即將推出嘅歐版機入面，採用新嘅加密技術，去令AK2i 失效，先守着歐版機玩老翻防線。但係香港賣嘅9 成9 係日本水機，就算歐版機玩唔到老翻，對香港都冇乜影響，日版一樣玩到老翻，老任依然係poor guy ，唉！
歐版NDSi 會加強保安措施嘅消息喺全球網站揚開晒，但係咪有效就冇人知啦！
PSP 5.05 絕招慘被破解
Poor guy 度：70%
Sony嘅poor guy 度都唔弱得老任幾多。早排PSP 兩隻BANDAI 大作《idolM@ster SP 》同《高達戰場之絆》，都以規定升級上5.05 firmware 呢招去抗ISO ，本來已經大成功，其他game 廠可以齊齊效法。點知最近《idolM@ster SP 》率先被黑客攻破，用修改ISO 程式碼嘅方法，令PSP 唔使升上5.05 都玩到，睇怕《戰場之絆》都遲早失守，抗老翻嘅終極方案仍然係PSP-3000 。
黑客修改完《idolM@ster SP 》ISO 程式碼後，仲整成補丁file 供人下載，傻瓜都識玩，離譜！
XBox 360 有key 就玩到老正
Poor guy 度：10%
講抗老翻，都係微軟最成功，改機玩360 老翻嘅人少之又少。啱啱佢仲諗到新橋，打算日後用晒peer to peer 嘅方式去賣game ，玩家下載隻game 嘅同時，仲會買到一個key ，之後只要喺任何裝咗嗰隻game 嘅360 度，輸入番個key 就可以玩game。呢種賣game 模式咁方便，有望引到所有老翻友改邪歸正，微軟唔使poor 啦！
微軟提出新賣game 方案後，全世界勁多gamer 都討論緊，唔少人贊成咁做。
電機兒
見盡奸商、騙徒，恃住有幕後高人力撐，唔怕得罪人，有嗰句講嗰句！
