本地足球界好耐冇熱話，但組成3個月即踢出爭氣波，砌低傳統強隊南華贏得銀牌錦標的天水圍飛馬無疑hot talk ，上星期先有平安夜出書《一人一故事》，再到星期日巡遊慶祝，最受愛戴的，是這位外形似法國球星亨利的27歲隊長鄭少偉，街坊隊友個個索性叫佢亨利！
亨利已成天水圍飛馬代表人物及隊長，每次出賽有不少fans 等簽名，天水圍中學生居多。
本月21日奪得銀牌獎盃，亨利身穿寫著「never give up 」底衫，流下男兒淚。
港版亨利profile ：
出生：1981年12月27日（27歲）
學歷：元朗鳳溪中學F.3畢業
身高：1.77m
體重：65kg
位置：前鋒、中場
擅長：拉開防守及入揳
曾效力球隊：花花（02-03年）
流浪（03至04年）
南華（04至08年）
天水圍飛馬（08至09年）
網上設計圖片
數本地球壇上一代的代表人物非「和仔」李健和莫屬，被網民封為經典事件莫過於00年不服判決用波射球證，並被球證返打。網民後來做了張「Winning 」遊戲封面及捏造和仔以6,500萬英鎊加盟皇馬新聞贈興。
本來我讀完中三做緊地盤水電工，人工過萬㗎，教練叫我試腳，我懷疑都係因為似亨利。
冇錯，本地波，大家好耐都冇睇，數得出的球員可能只有N 年前的李健和、歐偉倫。今日，多咗呢位「亨利」。「其實我都明㗎，打開電視已經睇到世界頂班聯賽，叫人入場睇波唔易！所以近年以新界社區為基地的球隊反而受歡迎，令社區更有氣氛，去買餸都會有人叫我亨利。上年有大埔和富，今年有我哋天水圍飛馬，入場人數可以過千！我試過踢南華時都可以得幾十人睇咋。」
雖然只得27歲，已踢職業波7年，法國球星亨利出名身材高速度快，射波刁鑽，港版亨利華人有177cm 高（亨利188cm ），樣貌似，奔跑速度亦有，man 爆外形估唔到係有把幾卡通聲，「我響上水長大，15歲開始去元朗踢波，因樣似亨利，所以人人叫我亨利。元朗有七人盃賽，職業球員都會嚟踢，識到教練趙銘安。本來我讀完中三做緊地盤水電工，人工過萬㗎，但因為真係鍾意一大班人踢波嗰種感覺，教練叫我試腳，但我其實唔算超好波，唔夠大隻，我懷疑都係因為似亨利。」
'08正牌亨利Reebok 廣告
球星偶像： 亨利、柏金
近期熱聽：Tank （台灣歌手呂建中）、Akon 、王若琳及曹格。「Tank 同王若琳最啱比賽前搭車聽，落場前就聽Akon 振奮自己。」
最愛電影： 《女人四十》「因為鍾意蕭芳芳。」
常瀏覽：自己於Yahoo 的專欄
除咗批評，又有網友讚本地亨利型啲。上圖為贊助法國亨利的Reebok ，所拍下的廣告，concept 玩正牌亨利入球後豎起食指叫人靜啲嘅意思。Reebok 官方話贊助鄭少偉部分原因係佢似亨利。
雖為隊長，但作為前鋒，今季至今只入2球，有網民批評，亨利話：「我都覺得唔好，入球能力弱，惟有盡力走位俾其他隊友射多啲。以前我好介意呢啲言論，但今日已學會只要盡力，不需再理會這些聲音。」
天水圍飛馬主贊助商是Playstation ，亨利（右下角）就與隊友、E cup baby 、黃榕及動漫Maggie 出席event 。
於平安夜出版的《一人一故事》，亨利大講自己入行經歷，但佢最難忘係隊友龍門奧利華拉故仔，「後生時佢同AC 米蘭個迪達係世少盃隊友，可惜後來遇上車禍，現時右手依然鑲滿鋼片。」$48。（各大便利店有售）
05年南華教練黃文偉已經60幾歲，見到老人家嗰種失望眼神，令我發誓以後都唔可以再令身邊人失望。
年前鬼佬翻版碧咸可以來港搵銀，呢位翻版亨利開始時就差得遠：「幾千蚊？都冇呀，踢花花時人工真係低到唔方便講，好彩踢波唔使使錢，而家？過萬囉！以前南華好景時，唔多落場比賽嘅都有二萬二蚊，我入行時是球市最低潮加沙士，轉去期望的南華又撞正搞緊全華班，唔用外援，結果一隊班霸差啲要降班！」05年時，南華教練黃文偉已經60幾歲，在護級大戰對公民比賽後，見到老人家嗰種失望眼神，令佢發誓以後都唔可以再令身邊人失望。
06年南華重回聯賽，並由前主席羅傑承入主，其娛樂公司（BMA ）旗下藝人有關心妍、周麗淇等，「羅生搞波兼顧商業價值，我呢世最開心嘅trip 係同球會去杜拜，住5星級酒店，300蚊美金一晚，住咗10幾晚！畀到本地球員一份難得的尊重。」操練完冇換衫成面汗都跟筆者做訪問，說話唔算口若懸河，但非常真，「嚟緊願望係可以再入選港隊落場，省港盃嚟緊希望有更多人睇波，人多氣氛好，先會踢到好波。」想香港有個「真」亨利，就要靠我哋。
