江湖傳聞，比iPhone 3G 細接近3嘅縮水版mini iPhone ，年底將吹到嚟！美國總部雖然無任何證實或公佈，之但係大陸山寨廠已快刀斬亂麻，急急腳出咗部國產mini iPhone （m888a ）。日前先達場內已Set 好壇俾用家試玩，感覺十足MacWorld 進駐先達咁熱鬧；老翻、抄款可以玩到咁大模廝樣，真係勁離譜！記者：陳國輝攝影：梁細權
縮水1/3加粉紅殼
■厚度最接近，而且有USB 位駁電腦添！
傳聞歸傳聞，實情有無mini iPhone 呢樣嘢真係無人知，大陸山寨廠就馬上信以為真，搶閘出先諗住食頭水！既然識穿咗佢只係一部國貨，就唔使同真正蘋果iPhone 比質素，要比？咪盞輸成條彌敦道！m888a 忠於夠「細」，長度較iPhone 縮水接近1/3，厚度方面差唔多，至於重量只係輕咗幾克，拎上手仲有啲份量；講「mini 」交足貨㗎！可惜過晒龍，明明蘋果只係得黑、白兩色，佢就畫蛇添足整多隻粉紅色，銀邊位仲搞到又紅又金，以為好有創意，連Sales 都話「邊有人Buy 㗎！」
雙卡槽照送磚頭充電
花幾百蚊買部國產mini iPhone ，斷估都知佢玩唔到Multi-Touch 、3G 上網、App Store 等Hi-Tech 嘢啦！一眾機友都心知山寨機「精粹」在於雙卡雙待，亦係經常往返中港兩地人士嘅至愛，m888a 亦有加入無令大家「失望」；包裝亦非常「注重」，一個簡單印有手機正面嘅白色紙盒內，配件包括一隻好Apple Feel 嘅USB 白色磚頭形充電器，純白Hands-free ，跟住加料送多個黑色絨布袋，全Set 裝備都充滿iPhone 感覺，果然夠晒黑色幽默。
1機盒仿真度有90%！
2絨布袋上又多另一個Logo ？有抄摩記嫌疑喎！
3山寨機例牌送Stylus ，但今次要拆蓋先搵到。
4機身細咗但可插兩張SIM 卡。
假8GB 又捽又寫
查實出現於先達嘅山寨版iPhone 已唔止一次！記得半年前過部最「原汁原味」，既可手指捽相簿，更可玩到Multi-Touch 將相片拉大縮細。今次m888a 只不過將機身縮水，欠缺突破性之餘，仲比上一代功能有所刪減，例如無咗以上提過過兩種功能之餘，最諷刺係機殼及包裝盒上竟然印住8GB 字樣，但實際試用時發覺竟然完全無內置記憶體（需要插入記憶卡）！擺明抄完就算，跟事實不符，所以話老翻嘢無好嘢咋！
5好大隻字寫住「8GB 」，原來只係裝飾。
6鬼馬！有捽芒解鎖。
7多媒體Player 勁簡陋。
Profile
制式：GSM 雙頻體積：86×48×12mm重量：110g通話時間：180-280分鐘備用時間：160-260小時主要功能：2.4吋26萬色Touch Screen 、內附Stylus 、手寫輸入、雙卡雙待、支援最高2GB microSD 記憶卡、VGA 相機、藍芽查詢：創意科技（23934568）
■機殼都玩兩款Logo ：有葉蘋果同埋無葉蘋果。
■只係Icon 有少少執過位，仍說得上「忠於原著」。
$838（送1GB microSD 卡）
