本週三起，食環署將引用《禁止未經准許而展示招貼或海報》條例，掃蕩商業用途易拉架，屆時食環署除即時沒收易拉架外，亦會票控在場職員，最高罰款一萬元，灣仔及銅鑼灣區率先執法，其後殺入旺角。
措施實行倒數，全港五千名靠易拉架搵食的電訊、銀行、財務公司推銷員，人心惶惶，質疑政府措施不近人情。有職員更爆料，指食環署近月頻用陰招趕絕他們，連跌支筆都拉，為了抗衡政府，他們已聯絡工會力抗到底。
自九月尾食環署公布將全力掃蕩全港商業用途易拉架後，在旺角西洋菜南街依靠易拉架為生財工具的電訊、銀行、財務公司推銷員顯得一片愁雲慘霧，他們一見記者便大吐苦水。
「冇咗易拉架，啲途人點知我係邊個、代表咩公司？」任職銀行信用卡推銷員年多的Movie 說：「啲商戶話我哋阻佢門口，咪行開囉！途人話我哋阻街，咪擺埋啲囉！我哋只不過搵食，唔係呃唔係搶，就成日俾人恰！」
十九歲的Movie 每日返工朝十二晚十，日晒雨淋月薪只不過一萬元左右，「我底薪得三千五百蚊，之後每個成功申請到信用卡嘅客，我哋才抽百幾蚊佣！」
帶三套衫換都唔夠
穿上整齊套裝當制服的Movie 形容金錢賺來有血有汗，「我哋冇冷氣嘆，累嘅時候冇椅座。每日帶三套衫嚟換都唔夠，兩個月不足就換一對高踭鞋。」但最慘，還是途人經常擺出漠視嘴臉，「我哋無論遇到乜嘢人都要笑，有啲人唔申請咪算囉，仲要玩人，問我放工去邊又乘機揩油！」另外，還有一些禮物黨，專為禮物填表格，填報資料全部虛假：「佢哋初時好熱心，但一收番表格睇，乜西貢有四十層高大廈咩，點解電話有九個位？」
工作辛苦，但Movie 仍繼續做，是因沒有別的選擇，Movie 中五畢業後做過文員、sales 等，但人工頂多六千元，但推廣員月薪有一萬元，當然選擇推銷員。
食環署是次美其名指接到很多市民、商戶、以至駕車人士投訴，指五年前開始流行的易拉架阻街，阻礙駕車人士視線，容易構成意外。
不過，在有線寬頻公司任職易拉架推銷員的阿Cat 認為，政府一直都想趕絕他們，「近半年食環署啲人幾乎每隔十米就喺我哋身邊駐守，佢哋一開始同我哋扮friend ，講邊個唔啱，邊個唔好，嚟分化我哋每個檔口嘅關係，但其實係要拉我哋亂拋垃圾。」
她說，由於避免易拉架被風吹走，豎立易拉架時，須利用膠紙或繩，緊緊固定在欄杆上，食環署職員便監視著他們有否不小心將膠紙遺棄地上，甫見到便即時拿出告票，罰款一千五百元！「佢哋行動好快，好多時我哋只不過趕唔切執番啲垃圾都中招！」阿Cat 說，有次她跌了原子筆在地上，也被罰款千五元：「冇情講㗎！總之佢哋話亂拋垃圾，我哋就冇得抗辯，之後嗰日就要白做，因為公司話明唔會同員工分擔。仲有之前喺奧運期間，政府話明要重整市容，唔俾我哋放易拉架，搞到我哋好似過街老鼠，焗住要拉住手推車喺街道上周圍兜客！」
今年十八歲的阿Cat 當了推銷員兩年，她形容推銷工作就像「四面楚歌處處受敵」，愈來愈難做，連公司也逼她們，「公司每日都會搵人落嚟監視住我哋，一見我哋豎唔足啲易拉架，就會扮途人影我哋相，第二日嗱啲相出嚟逐個計數，總之邊個豎少一支易拉架罰款五百蚊。」
原來，每人每日一出街獲分配三支易拉架，但由於同行競爭劇烈，他們一般要鬥早擺放易拉架，為了不被公司罰款，推銷員一般明知阻街，甚至阻擋商戶門面，也在所不計：「一支五百蚊喎！我哋一日都賺唔到五百蚊啦，所以咪成日同啲商戶嗌交囉！但我哋工作的矛盾同慘況，政府又點會知啊！」阿Cat 說。
損失四成生意
除了推銷員，專門製造易拉架的公司，也受到嚴重影響。○三年成立、生產至少七成易拉架的Banner shop 負責人傅備斌表示，公司至少失去四成的生意：「我哋以易拉架起家，一個月至少生產一萬支易拉架，雖然易拉架零售價七十五蚊，成本都要六十蚊，利潤唔高，但其實易拉架如我哋招牌一樣，吸引客人走入我們間鋪，再選購其他產品。」他擔心，沒有易拉架後，會直接影響公司其他如帆布、人形企牌、以至將宣傳品貼滿車身的「車身貼」服務等生意。
為了變招繼續經營，他說會考慮向各電訊、銀行、財務公司改用「車身貼」宣傳車及租用鋪位作為易拉架展銷點。
香港公共事業工會聯合會秘書長崔世昌表示，新例並沒有顧及前線員工的感受：「講真，佢哋都係打工，受老細指示落街豎立易拉架，但政府咁做對班職員好唔公平，變相逼他們唔好撈！」
此外，他亦認為在目前年青人就業困難，新法例只會引致社會更多不安：「而家即係叫一班推銷員冇工開，咁你叫佢哋做乜啊！」
即時票控
過往，食環署掃蕩易拉架，只可引用《阻礙清潔街道》條例，要求物主接獲署方通知四小時內收回易拉架，若不遵從才作出檢控，最高罰款五千元及入獄三個月。
但自十月起，食環署將增加引用《禁止未經准許而展示招貼或海報》條例掃蕩，並會即時沒收易拉架及票控在場職員，若當時沒有職員在場，物主稍後到該署取回易拉架時，也會被票控。至於會否檢控商戶，署方指會按架上宣傳資料追查，若有足夠證據，才作起訴，罪成最高罰款一萬元。
全港五千易拉架推銷員，工作不是呃不是騙，但偏偏面臨失業危機。
Banner shop 負責人傅備斌（左）指政府打擊商用易拉架，將失去至少四成生意。
推銷員已將易拉架放在路旁，將影響減至最低，但依然成為食環署新例下，首被掃蕩對象。
為了生計，Movie 除當推銷員，還秘撈走到酒樓表演，唱老歌娛賓。
