只係講Will Wright，相信大家未必知道佢係何方神聖，但只要講係設計「SimCity」同「The Sims」的遊戲大師，機迷冇可能未聽過吧！外國遊戲界早就將Will Wright捧上神枱，既稱呼佢做遊戲界的史匹堡，甚至連終身成就獎都頒埋畀佢。以為就咁可以蹺埋雙手唔使做？當然唔得啦，Wright用了7年時間打造全新力作「Spore」，遊戲既結合模擬兼即時策略，由單細胞時代玩到整太空船兼去埋星際旅行，內容浩瀚到冇人有，直頭似神創造萬物咁偉大！
特派記者：布偉倫鳴謝：Electronic Arts
機迷有38%神力
今趟「Spore」揀了在新加坡做亞洲發布會，幾個新加坡傳媒一見到Wright就開玩笑地話「Spore」係新加坡英文名的縮寫，遊戲命名係唔係別有含意？Wright答話原本諗過用「Sim」字頭，但後來決定用番開發代號做遊戲名。「Spore」定於9月7日全球同日推出，查實在6月中已出了隻「Spore Creature Creator」畀玩家設計唔同種類生物上載到官方網站，到時可以擺落遊戲入面玩，原本諗住到9月出遊戲時可以蒐集到10萬種生物，點知推出22小時後已達標，現時累積了逾250萬種生物；Wright更開玩笑話以現時已知有150萬種生物品種，神用了7天時間去創造，而「Spore」Fans都只係用了18天，玩家們的能力已等於38%「神」力，唔好睇小機迷！
玩足70年
為配合遊戲中創造生物的主題，連發布會都好貼題地在新加坡動物園內舉行，一行出舉行發布會的餐廳就見大笨象同長頸鹿，而在草叢中更隱藏了唔少「Spore」生物紙板公仔，非常有諗頭。除可以自己配搭唔同手手腳腳創造生物之外，遊戲之中更可以發揮大家的創意，設計唔同的交通工具同太空飛船，不過要在遊戲中後段先可以玩到。「Spore」遊戲主要分成5個時期，由最初單細胞時代，進化到成為生物，然後就發展成為高智慧生物，並形成部落，跟住科學發展而進化到文明時代，當累積到一定程度的科技能力就可研發太空船探索其他星球。據遊戲資料所講，要完完全全探索晒遊戲內所有的星體係要花上真實時間七十幾年，肯定係遊戲界之最。
即時策略元素
「Spore」前半部生物進化的概念，其實同Will Wright十幾二十年前的舊作「Sim Earth」都幾相似，不過當然畫面造得更靚，另外就係加入即時策略元素，可以同其他單細胞生物、生物、部落或文明死過。玩家可能會覺得奇怪，點解「Spore」仲係單人遊戲？據Wright解話就話單人玩法可以畀玩家有機會暫停遊戲以及用Cheat Code，而其實遊戲中所遇到的生物等就真係全由其他玩家貢獻出來，一樣有互動性。計我話遊戲好玩就得，唔使介意係唔係多人對戰，總之今次隻Game有排煲。
遊戲5大時期
a 細胞期
明明細胞唔應該有眼，但Wright話加對眼畀佢好似得意啲；而只要玩家所控制的細胞搶夠足夠的DNA就可以周圍漂浮，繼而進化為生物。
b 生物期
生物界弱肉強食，設計生物時如果只從外表可愛着手的話，分分鐘唔夠其他生物搶食物而絕種。
c 部落期
形成部落後唔使再單打獨鬥，有埋其他同類幫手爭地盤，爭贏令勢力坐大的話就有望進化到文明時期。
d 文明期
只要在文明時期打低晒其他在同一星球生存的文明，就可發展太空船上太空玩「星戰」。
e 太空期
這時期所花時間最長，玩「星戰」兼太空殖民，而且遊戲內的銀河系之浩大跟真實唔差得遠，好在飛行時間短得多。
遊戲資料
類型：模擬/即時策略開發：Maxis/Electronic Arts
平台：PC 推出日期：9月7日
售價：待定網址：
http://www.spore.com/
好在發布會在動物園內的餐廳舉行，有冷氣，唔係實熱死同曬死。
記者們就係搭這種畫晒動物紋的觀光車前往發布會會場。
Will Wright在發布會上講解點解會設計出「Spore」，不過佢的說話速度真係快得好交關。
行多幾步，就會見到「Spore」生物紙板公仔隱藏在草叢間，好搞鬼。
