俄羅斯喀山→下諾夫哥羅德→莫斯科→白俄羅斯明斯克→波蘭華沙→克拉克→奧斯威辛→捷克布拉格→德國法蘭克福→柏林 共行4,214km
唔經唔覺四驅狂人Bobby 去咗歐遊已經成4個禮拜，上個禮拜去到俄羅斯嘅喀山，遇上奇車靚景之後，八卦友都好心急想知佢今個禮拜橫越白俄羅斯、波蘭同捷克，直到德國柏林，呢段4千幾公里嘅路程又有乜奇遇？
呢個商場勁有特色！集新、舊建築於一身，香港政府學嘢啦！
各位觀眾……A 餐係午餐肉公仔麵，B 餐係回鍋肉公仔麵，C 餐係五香肉丁公仔麵！
「不到紅場非好漢！好彩我有去過！」
去俄羅斯當然要去紅場！我哋由下諾夫哥羅德揸成4百幾公里去莫斯科就係為咗踩吓紅場，感受一下世界數一數二最大廣場嘅滋味！紅場有度比大陸天安門好，就係可以泊車，而且仲可以同架車合照，正！而且俄羅斯非常文明，唔會好似香港政府咁見舊嘢就拆！好似我哋去咗其中一個大型室內商場，就係由好舊嘅建築物改建而成，成個天花都係透明，下面就係外表古舊但內里新潮嘅鋪頭，勁有風味！第23日，我哋終於到咗波蘭華沙同克拉克，咁岩撞正佢哋假期，每個廣場同每條街都好多人，而且仲有騎呢軍車展覽，搞到成個市旺晒，仲多人過銅鑼灣！
無啦啦有部軍車喺廣場，又畀人隨意影相，好似去咗片場！
睇外表真係難以相信係集中營，唔知仲以為係學校。
「集中營都靚過人！」
當年德軍入侵好多鄰國，尤其波蘭同捷克最大鑊，喺境內起咗好多集中營搞種族清洗，我臨離開波蘭前就參觀咗其中一個，外表好似好靚咁，又用紅磚砌成，又有大樹草地，但過去都唔知有幾多人死喺呢度，地方幾靚都冇用，冇自由乜都假！
由於歐洲國家比較細，話咁快兩日後已經揸到去德國法蘭克福，呢度啲建築物真係一絕！新舊共冶一爐，好多古董建築仲保存得好好，莫講遠望一流，近睇甚至手摸都好似新嘅一樣。我哋亦都喺法蘭克福食咗個露天港式早餐先出發去柏林，有咩食？煎午餐肉、公仔麵同埋回鍋肉！好食過德國大肉腸多多聲！
