可改機嘅3.95版主機已經所餘無幾，加埋最新出勁搶手嘅金屬藍色，再加限定要跟4GB 咭等配件一齊買，全套埋單隨時要$2,180，邊有$1,380定價咁平！
先問你一個問題，你知唔知PSP 行貨定價幾多錢？
答案係$1,380！答錯咗都唔好難過，因為佢同iPhone 3G US$199個機價一樣係假象嚟，根本冇可能用呢個價錢買到部機。點解？Sony 又要人同綑跟game 買機，game 鋪又炒貴啲特別色機，最近仲因為新一批貨改唔到機玩老翻，搞到改到機嘅舊貨又俾人再炒貴。好多鋪頭買機仲限定要跟記憶咭買，計埋全套郁啲都過$2,000，貴過原價咁多，打機啫，仲慘過捱通脹。
想喺細game 鋪買行貨淨機都有嘅，但有少數狼死嘅鋪頭連改唔到機嘅新版機都炒貴到$1,580。
有啲game 鋪嫌賣淨機冇肉食，點都要賣跟咭套裝，畀個參考價你，淨4GB 咭市價約$250，咁你就知佢賣貴幾多。
舊貨改到機貴$200
最近PSP 突然被炒貴咗，因為舊過批3.95firmware 機種停咗產，而家Sony 批出嚟嘅新貨，全部係改唔到機嘅4.01firmware 機種。玩唔到老翻，啲新貨就冇人買，個個只會搶購市面剩番好少嘅3.95機種，於是啲game 鋪又乘機炒貴批舊貨，淨機大約由$1,480炒到$1,680，貴咗13.5%，勁過通脹多多聲！但你會問，又話PSP 定價係$1,380，點解又變咗$1,480呀？等我再解釋畀你聽。
全場game 鋪冇正價
淨機$1,380呢個價，其實只會出現喺Sony partner shop 同連鎖電器鋪，其他細game 鋪因為冇Sony 批發嘅戶口，要賣PSP 就要經大拆拆貨，來貨價就升到$1,400，所以佢哋要賺錢，就至少賣$1,480炒價。
3.95版係改唔改到機嘅關鍵，有啲鋪頭寫明啲機係「Ver 3.95」，但就怕被海關拉，隻字唔提改機。
硬屈買跟咭套裝機
$1,480個價點嚟就我知你知啫，但game 鋪唔會認自己賣炒價機嘛，以前就可以用改機費呢個名目嚟掩飾啫，而家有反規避條例就唔可以再咁揚，所以通常跟張只值幾蚊嘅保護貼，然後就話係名貴靚貼嚟賣貴$100。
不過呢條橋實在冇乜說服力，於是更多鋪頭會用賣全套機呢招，即係跟機包埋4GBMS PRO Duo 、保護貼、機套同USB 線，賣$1,680（可改舊貨炒貴後變$1,880）睇落都唔算貴。但其實啲貼、套、線全部唔值錢，咁賣法game 鋪仲會賺多咗錢，對個客嚟講，咁買全套機又抵過去電器鋪同綑機加game 嘅。
金屬藍仲未係全場都有得賣，但其餘兩部搶手嘅特別色火焰紅同無光銅由於貴過其他色，所以要另外標個價。呢3隻色之後，最多人買係最初出嘅鋼琴黑同冰燦銀，而家賣到斷晒貨。
烈焰紅+$300
金屬藍+$300
無光銅+$200
鋼琴黑+$0
冰燦銀+$0
薄荷綠+$0
陶瓷白+$0
雛菊藍+$0
玫瑰桃+$50＊
薰衣紫+$0
特別色「喪」加$300
睇到呢度，計嚟計去PSP 全套最貴都係$1,880啫，點嚟前面張相$2,180個價呀？最後要講埋你知，原來唔同顏色嘅機，價錢都有唔同，有3隻特別色因為少貨搶手，所以會再貴2、3百，加埋就係$2,180啦。薄版PSP 總共有10隻色，想知邊隻色要加錢、邊隻唔使，睇吓呢個表啦，根據受歡迎程度嚟排名。
＊全因貨少而炒貴，實質唔受歡迎，奇！
行水買機指南
上述機價仲未計水貨喎，新一批水貨都轉用咗新底板，所以舊過批水貨因同一原因被炒貴，只係炒價平咗約$100，但水貨冇保養，平少少值唔值就你決定啦。咁多唔同版本，咁多個價錢，流攤華報料畀我聽時，連我都要消化咗一陣先明晒，等我再列個表等你易睇啲啦！
電器鋪售價
行貨約$1,380，全部色同價，須連指定遊戲買機，由$218至$278。
電機兒
見盡奸商、騙徒，恃住有幕後高人力撐，唔怕得罪人，有過句講過句！
