當年啲PC game 好多都係幾十蚊一隻，學生哥都會買正版，薄利多銷咁先係路嘛！
自從十幾年前開始沉迷睇戲同上網，已經逐漸疏遠遊戲機，之後連PC game 都戒埋，一大原因係覺得啲game 唔好玩。雖然讀者未必會認同，但筆者真心覺得而家啲game 一味掛住整色整水，而我次次見到啲亂到九彩嘅3D 畫面就唔想玩，係都要睇番2D 先順眼，所以近十年正經玩過嘅都係舊game 。（《Ketchup 》咁多game 代理、game 迷睇實，喺度講呢啲嘢，輕則俾人歧視，重則俾人排擠，好大風險㗎！）
咁「原始」嘅畫面先係我嘅至愛！臨尾一場根據你道德值嚟決定俾十大善人定十大惡人圍攻，呢條橋都幾過癮！
陳柒
最近搵舊碟，忽然見番隻《金庸群俠傳》，唔係online ，而係1996年第一代，於是抽起條筋想玩番。但自從冇用Windows 98之後，DOS game 已經玩唔番，要用software 模擬DOS 嚟玩先得。一開隻game ，啲回憶又返晒嚟，記番當年狂煲嘅情景，玩到會考前夕都仲玩緊，搞到慘烈收場（梗係要搵啲嘢賴）！咁多年嚟仲爆過好多次，但對上一次玩都已經係幾年前嘅事，有啲細位唔記得，都要上網search 番點過。結果，用咗兩日，不眠不休咁玩咗27個鐘終於爆咗，仲有時間儲埋level 練十級野球拳，兩下就可以KO 最勁嘅東方不敗。記得隻game 當年賣$98，可以玩足十二年，都幾抵！DOS 模擬器網址：
http://www.dosbox.com
