唔該，我電機兒想提名PSP 做本年度最有商機gadget ！
點解？4．25反規避日之後，有game 鋪因為失去改PSP 呢個商機，搞到要關門大吉。早排「芒亨」一出，又有網站發起「輪電大會」，借住幫網友改機嚟宣傳partner game 鋪。而家仲離譜到有旅行社組織改機團，齊齊上深圳改機兼掃記憶咭。香港唔畀改機，就走上大陸改，諗諗吓都幾似《賭神》出公海殺人嘅橋段，間旅行社仲有團費收，真係識做生意。不過，件事咁邪道，電機兒偏要踢到佢哋成唔到團，先覺對得住自己！
$138團費包改機
呢間旅行社最寸係響Yahoo 拍賣場大賣改機團廣告，驚死冇人知佢哋做犯法嘢咁。個團名好巴閉，叫「深圳電玩購物一天遊」，點遊法？除幫人改PSP 呢個重點節目外，原來只係行完兩個hea 景點、食完餐飯，就帶人去東門掃MS Duo 同R4，咁就收人$138團費，唔用改機gimmick 嚟包裝，怕且都幾難有人幫襯。最離譜仲係個團真係由有旅行社牌照號碼嘅公司搞嘅！帶人上大陸集體進行侵權行為，點講都唔啱，查完旅發局臧明華，唔該查埋佢！
報團放蛇實錄
愈睇個團愈唔對路，見到Yahoo 廣告上面原來仲有旅行社地址，好！一於等電機兒去報團睇吓佢咩料先。
罨耷旅行社
去到先知間旅行社原來響筲箕灣一幢罨耷大廈地下，豆腐潤咁細，條巷仔又好鬼陰暗。
阿姐乜都唔知
入到去見到個阿姐，我話想報改機團，但佢好似唔知頭唔知路咁，淨係print 番Yahoo 廣告張單張畀我睇，叫我打去問佢老闆。我真係幾想問候佢老闆！
老闆親自改機
張單張上面寫查詢人係梁先生，仲註明佢就係PSP 經驗會員FIRELLHK ，阿姐話佢就係老闆。勁！老闆親自幫人改機。
結果：項明生一到，改機團延期
電機兒就打去問清楚呢位梁先生，佢猛話因為自己同時係game 鋪老闆，所以諗出呢個「嶄新概念」嘅旅行團，不過原定5月31日個團搞唔成，delay 到6月中，乜咁兒戲呀！仲要日期、團費、集合地點全部仲未確定，搞到我想報團跟團直擊實況都跟唔成，最後旅行社阿姐叫我留低姓名做登記先，好呀！我話我叫「項明生」（SCEH 市場部主管James 真名），佢都仲未知乜事。之後我上番Yahoo 見佢連廣告都detele 埋，都唔知係咪揚得滯俾人嘈完要避風頭。查實香港有啲邪道game 鋪仲鬼鬼祟祟幫人改PSP ，都唔知做乜要上到深圳改機咁舟車勞頓，但電機兒梗係要呼籲大家支持正版，唔好改機啦！
電機兒
見盡奸商、騙徒，恃住有幕後高人力撐，唔怕得罪人，有嗰句講嗰句！
成個團嘅重點係「誠邀Yahoo 豐富售賣PSP 經驗優質會員FIRELLHK 隨團出發」，由佢幫客人升級PSP 到玩到老翻game 嘅M33firmware ，但只限每人改一部，真矜貴！
為求認真，個團仲包埋8餸1湯午餐，一早寫定食咩餸，有菠蘿生炒骨，令我憶起去壹傳媒交稿時，路經canteen 食唔受歡迎嘅客飯。
報團方法竟然係入數入佢哋個銀行戶口先，然後fax 啲單據同資料，出發前會有人聯絡我。咁都得？走數點算呀？
旅行團搞手亦係Yahoo 拍賣賣家，拍賣品都係離不開game 同PSP ，其中一個拍賣係深紅PSP 行機連4GB 咭同少少配件就賣成$2,130，食水好深喎！
