古裝靚女朱晨麗（朱朱）剛於頒獎禮中成為「最佳女配角」得主，不過演技未達劇迷標準而成為話題，朱朱未有因此感到失望，去年拍足四套劇的她直認「收成期」來得比想像中早，接下來會有多套新劇推出，希望觀眾能看到她的成長並給予認同。
朱晨麗今年會有四套劇出街，望演技得到認同。
無綫花旦朱晨麗是電視城新一代古裝美女，在多部劇集中以各種古裝造型示人，輕易駕馭並深受劇迷喜愛，今次在《平安谷之詭谷傳說》中的旗袍造型風情萬種，手執琵琶時更仙氣逼人，一播出便吸引觀眾眼球，朱朱表示有注意到網民談論她的身材，笑言：「旗袍裏面只着保暖內衣，Pat Pat都冇墊嘢o架！」
偏愛古裝
講到靚樣容易掩蓋演技上的發揮，朱朱坦言：「一開始大家會留意已經好開心，身為女藝人點會唔想靚？自己都想貪心啲，大家可以再留意我演出多啲！」要成為大家眼中的古裝美人，身為蘇州姑娘的朱朱天生一副氣質美，她笑說：「試過後發現自己好鍾意古裝，造型上唔會有壓力，着起嚟演戲係舒服、自然，可能受屋企人薰陶多，自小都偏愛宮廷、民初題材。（學舞令你更優雅？）都有關係，要多謝媽咪自小培訓，因跳舞係要肢體上靚，所以對擺甫士以至後來演動作戲都有唔少幫助。」
朱晨麗於《平安谷》演少奶角色，頻穿旗袍示人。
朱晨麗奪「最佳女配角」惹來回響，她樂於接受觀眾意見。
朱晨麗身為蘇州姑娘，舉手投足散發古典氣質。挑戰奸角
朱朱剛於《萬千星輝頒獎典禮》成為「最佳女配角」得主，卻引來不少回響，她坦言作為演員演技仍有進步空間，今年將有四套新劇推出，每一套都有不同挑戰，希望能贏得觀眾認同。而《平安谷》中她首次挑戰奸險角色，劇中與好戲之人蘇玉華有不少對手戲，朱朱樂見自己能成為觀眾的「眼中釘」。稍後，朱朱將會拍攝電影，飾演亦正亦邪的周芷若，她坦言是從演以來最大挑戰：「未幻想過演武俠小說角色，有太多前輩演過經典版，希望我嘅版本可以向前輩嘅經典致敬。」
文：影視組
攝：劉斌
化妝：Henry Li
髮型：Haysses Ip＠HAiR
