由黃子華及佘詩曼主演嘅賀歲電影《棟篤特工》今日舉行了發布會，除兩大主角外，C君及專家Dickson亦有出席。對於今次電影嘅投資方同TVB有官司糾紛，未能於TVB宣傳，子華坦言做人最緊要靠自己！
撰文：東方新地
黃子華：做人靠自己
對於今次電影未能於TVB宣傳，子華笑言做人最緊要靠自己：「以前我每次做棟篤笑，TVB咁啱都有播我啲劇，好多人仲話TVB幫我宣傳，我同人講真係冇夾定，但後來我做騷TVB冇再播我啲劇，啲飛都賣得唔錯，所以話做人最重要都係靠自己，你唔得邊個都幫你唔到。」至於拍檔佘詩曼就話：「官司係公司同公司之間嘅事，對我冇直接影響，最緊要大家買飛入場支持，子華話齋，要靠自己實力。」
子華同阿佘相隔多年後再度合作，子華話見到阿佘好開心，阿佘亦表示同子華合作好正，因為子華寫得好又演得好。
子華話仲未睇套戲嘅完成版，都好期待！
拒唱主題曲
子華過往都有唱電視劇主題曲，但佢自爆原來一向都唔鍾意唱主題曲：「今次電影監製叫我唱，我即刻話我好憎唱，呢部戲嘅質素唔應該搵我唱，但原來已經作好晒曲詞準備好晒，係欣宜唱，音樂總監仲坐我背後，我當時非常尷尬，佢叫我喺旁邊搞吓笑就OK。」子華話除非自己覺得非常適合先至會唱：「今次填詞嘅係一個女仔，佢中英文都填得好勁，多謝欣宜唱首歌。」
阿佘同子華跟現場觀眾大玩遊戲，氹到班粉絲勁開心！
子華透露情人節會團年慶祝：「嗰陣就嚟年尾，食團年飯之外仲要去謝票，聽講我哋套戲預售反應唔錯，呢個年頭有預售仲反應幾好，係好唔容易。」
佘詩曼之前演出電影版《十月初五的月光》，因超時補水問題，令TVB向蕭定一公司興訟，阿佘話一切已交晒畀公司處理。
子華坦言抗拒唱主題曲，除非自己覺得非常適合先至會唱：「今次電影主題曲填詞嘅係一個女仔，佢中英文都填得好勁，亦多謝欣宜唱呢首歌。」
C君撐陸永黑面
大會安排佢哋同扮演成女僕嘅現場觀眾齊齊行catwalk，子華大笑C君同女僕觀眾有夫妻相，C君話：「我去過女僕餐廳，男僕嗰啲都去過，對方要跪喺度幫我落單，自己都好唔好思。」對於拍檔陸永喺無綫頒獎禮，被指失言激嬲阿叻陳百祥後被照肺，C君力撐：「冇啲咁嘅事，唔知點解啲人話佢黑面，佢唔講嘢嘅時候就係黑面㗎啦，佢喺我面前都好少笑。」
今次電影有唔少紅星客串，例如鄭秀文、張智霖、楊千嬅、吳君如、譚詠麟等等，子華話唔係佢嘅功勞，因為自己唔敢去邀請，但監製就敢，子華話：「今次有咁多朋友支持，證明我同阿佘都唔係令人討厭嘅人，多謝大家。」
子華笑C君同女僕造型觀眾好有夫妻相。
粉絲要求簽名，友善嘅阿佘當然冇say no。
