Fitbit將Ionic視為旗下第一款智能手錶，之前的Fitbit Blaze並不算是真正智能手錶。
Fitbit首款智能手錶Ionic終正式在香港發佈，雖然之前已可在市面上買得到這款智能手錶。手錶外形設計都算唔錯，可以換錶帶，兼且可自行更換錶面設計，但每次更換時都要使用手機內應用程式轉換。
這款採用Fitbit OS的新錶都有唔少特別賣點，主打都是健康與健身為主的功能，例如內置Fitbit Coach個人教練模式，用家可以對住錶上的動畫指示健身；另亦可自動追踨用家的跑步資訊，用家停低休息時程式亦會自動暫停；而且毋需連接手機下，手錶都可記低一星期內的步數及距離。
Fitbit Ionic智能手錶功能非常齊全。
Ionic錶底裝有多組感應器，可以感測心率記錄，甚至可判斷血氧濃度。
Ionic有幾項設計都比Apple Watch優勝，譬如Ionic具備50公尺深的防水能力，充滿電後可用到5日。另外Ionic可用內置記憶體儲歌（2.5GB容量）又或用來安裝自家平台應用程式，但內容選擇上就明顯唔及Apple Watch。Ionic都預設了Fitbit Pay功能，玩法類似用Apple Watch用Apple Pay相近，不過Fitbit在香港方面仍然同銀行方面磋商中，這項功能暫時未用得。至於價錢方面，Fitbit Ionic定價$2,598，開價跟最低價$2,688的Apple Watch Series3相近，而且可支援iPhone及Android手機。
Ionic設有換錶帶設計，用家可自行購買錶帶更換。
Ionic夠慳電，記者試玩大半日只用上十幾巴仙電量。
Fitbit同期亦推出Flyer無線耳機，可用上6小時。
記者初步試玩都覺得Ionic幾好用，尤其電量非常耐用，用了大半日只是用上十幾巴仙電量，唔使擔心返到屋企唔記得充電，第二日無得用。Fitbit在推出Ionic的同時，亦推出自家無線耳機Fitbit Flyer，功能包括防汗及有6小時操作時間，設計都幾大路，不過價錢就唔算太吸引。
Fitbit Ionic智能手錶／售價：$2,598
Fitbit Flyer無線耳機／售價：$1,298
記者、攝影：布偉倫
全新旅遊專頁，即like籽想旅行：
https://fb.com/travel.appleseed
