4月喺紅館開騷嘅趙學而話，只要一日唔放棄，始終有機會做到。攝影：沈健程
【我們的演唱會】趙學而等咗25年，終於4月28日舉行處女紅館騷。日前佢喺新蒲崗接受《蘋果》專訪，話希望帶畀大家訊息，唔可以放棄。學而又自爆：「我入行時係好竧𣉢嘅人，覺得究竟係乜問題？明明可以得到嘅嘢，點解仲未得到？但人會長大，經歷越多，再沉澱消化，會發覺越着緊越走，反而放輕鬆會攞到好成績，今年可以去到紅館。」
問學而會唔會請《皆大歡喜》演員做嘉賓？學而話成事會好玩，但絕口不提傳不和嘅梅小惠。問佢會唔會請小惠睇騷化恩怨？學而話：「有乜要化？我一直都冇恩怨，其實唔關我事，我唔會刻意去請，唔知人哋仲嬲唔嬲，如果我開口，人哋仲嬲咁點呢？我唔知人哋乜嘢心態，如果佢開心想嚟，我都歡迎。」
學而同老公蘇國基結婚多年，恩愛如昔。資料圖片
學而認為放輕鬆反而會攞到好成績。
學而（右二）當年同小惠（左二）一齊拍《皆大歡喜》時傳出兩人不和。資料圖片
拒死箍老公
講到老公蘇國基，學而話好支持，去年老公被雜誌爆密會女鄰居，學而即刻同老公平反。係咪百分百相信老公？學而話：「好多香港人都知道趙學而係幾兇狠幾辣嘅人，我唔出去做嘢時，老公都喺我身邊，佢嘅朋友我都識，咁你話，我老公可以走得出我邊一隻手指隙呢！」學而仲教大家點箍老公：「唔係話結咗婚就要箍得對方好緊，咁樣反而家庭問題更加嚴重。」
場地提供：香港九龍貝爾特酒店
化妝：Gabbie Lee
髮型：Pakho@POPEIGHT
