藝人林峯闊別本港電視圈5年，以英皇網劇《PTU機動部隊》作「復出」之作。記者會上被問到感情事即封嘴的他，透露已與古天樂經理人簽約，成為宣萱師弟，又指與前東家英皇關係好，日後會繼續合作。
楊受成與英皇網劇《PTU機動部隊》眾演員在記者會上大晒冷。
林峯、蔡卓妍（阿Sa）、張繼聰、方中信、譚耀文、溫碧霞、新人麥亨利及楊天宇等，昨午出席由英皇高層霍汶希出任製作人的網劇《PTU機動部隊》記者會，場面相當熱鬧。首次有機會穿上制服拍劇的林峯心情不錯，談拍劇問題滔滔不絕，但當提到女友吳千語，他即封嘴：「佢仲喺內地拍緊嘢，佢仲忙過我，我哋有聯絡嘅。（傳佢有新男友。）你問番佢啦，佢都係藝人，感情事唔講嘞，要講都講晒！」至於吳千語則透過電話回應：「不好意思，感情事不回答，謝謝！」
過檔簽古仔經理人
對於被指已約滿英皇，林峯說：「呢套係約滿後第一套雙方合作嘅劇，多謝楊受成先生同Mani（霍汶希）。（簽咗古天樂，成立自己工作室？）係簽咗畀佢經理人Ronnie，我同宣萱同公司，但未成立工作室，我想做好啲自己先。」阿Sa戲中與林峯及張繼聰都有微妙關係，首次在港拍劇的她因扮演女警，故戴短假髮配合造型，又指戴假髮令她頸部痠痛。阿Sa表示拍其中一場爆破戲發生小意外：「要就機位行埋啲，點知一爆啲碎片彈落我同拍檔塊面度，我好彩只係瘀咗，佢即刻流血呀！」
林峯與蔡卓妍宣傳網劇大談角色，但一講到吳千語就封嘴。
石修（左起）、盧慶輝、張繼聰、譚耀文、麥亨利、楊天宇及王藝霖合拍新劇。
吳千語我好忙o架！（設計對白）盧慶輝已婚有個仔
另外，方中信及譚耀文於戲內齊扮演警司，已20年沒有在港拍劇的譚耀文笑指自己今次「改邪歸正」演忠角。而「消失」多年的盧慶輝今次返港客串，透露自己結婚7年，育有一名4歲囝囝。
文：影視組
傳千語移情富二代
林峯唔敢答：你問番佢
有五年冇返香港拍劇嘅林峯，飾演阿Sa下屬，佢話同吳千語有聯絡。
林峯、蔡卓妍（阿Sa）、張繼聰、方中信、溫碧霞、鍾淑慧同好耐冇見嘅盧慶輝等，噚日喺西九龍W酒店出席網劇《PTU機動部隊》發佈會。五年冇返香港拍劇嘅林峯，喺劇中飾演PTU，仲係蔡卓妍嘅下屬。林峯離開英皇後轉投古天樂公司，問佢係咪會自組工作室？林峯就話：「我想先搞掂自己嘅工作，尤其係內地，都想有唔同嘅嘗試。」
提到同吳千語嘅感情，林峯話：「佢𠵱家喺橫店拍緊嘢，好忙，我哋有keep住聯絡，但感情就唔講，多謝大家關心。」有傳吳千語搭上富二代？林峯笑住話：「呢啲你問番佢，佢都係藝人，唔使我代答。」
阿Sa噚日戴住假髮出現，佢解釋因為做緊演唱會唔可以剪短頭髮。講到之前部劇拍爆炸戲受傷，阿Sa話：「當日拍嘅時候，我要就機位，所以企近咗，點知一炸，啲碎物彈到塊面，瘀咗少少。」
張繼聰就話無綫台慶頒獎禮當晚喺屋企睇電視支持，對於當晚《誇世代》監製上台領獎有提佢個名，張繼聰話：「監製有雷！其實冇可惜，完成呢個章節係好開心。」
吳千語 資料圖片
（左起）石修、張錦程、張繼聰、方中信、林峯、楊受成、蔡卓妍、溫碧霞同譚耀文噚日出席網劇發佈會。
定居北京的盧慶輝回歸拍劇。
盧慶輝追B
有18年冇喺香港拍劇嘅盧慶輝，喺內地做過地產同文化公司。問佢今次係咪返嚟過戲癮？佢話：「都唔係，我諗住係正職。」慮慶輝話結咗婚七年，囝囝都四歲，𠵱家定居北京：「個仔好玩到不得了，我有打算再追多個。」
撰文：馮仁昭
