噚日喺西灣河舉行咗「第二十二屆香港電影評論學會大獎」頒獎典禮，最佳電影由《踏血尋梅》獲得，拍呢部戲嘅白只同春夏攞埋最佳男、女演員，徐克憑《智取威虎山》獲最佳導演。
此外，大會還頒咗7部推薦電影，包括《十年》、《智取威虎山》、《唸唸》、《殺破狼II》、《華麗上班族》、《陀地驅魔人》同《哪一天我們會飛》，《十年》監製蔡廉明話：「香港係會有奇蹟，𠵱家為時未晚，估唔到反應咁好。」導演周冠威：「好多人話我拍呢部戲係自焚行為，希望自己事業未完。」
《十年》監製蔡廉明（右起）、導演伍嘉良、歐文傑和周冠威齊齊上台攞獎，為電影獲共鳴感到開心。
廖啟智有份拍攝嘅《十年》，獲大會頒發推薦電影。劇照
「試同性戀角色」
白只擊敗同片對手郭富城首奪影帝，佢話：「今次攞獎受寵若驚，自己之前好怕拍電影，希望以後多啲機會，多謝天父。」有冇信心喺香港金像獎再下一城？白只話：「未諗，能夠同張繼聰一齊入圍好開心，我肯定想佢攞，而佢一定話肯定想我攞，佢係我嘅偶像，真係演得好好。」
內地藝人春夏拍處女電影《踏血尋梅》封后，擊敗李心潔、楊千嬅、張艾嘉強勁對手，佢用普通話表示：「完全沒有對手概念，每次看回自己演出都很激動，擔心再不能夠演其他角色，因為會自我否定和懷疑，本人不是好演員，希望花更大努力在電影上。」問到有否信心獲金像影后？春夏坦言：「沒有，獎項只是獎賞，自己想試同性戀角色。」係咪同白只合作後怕咗男人？佢話：「不是，反而以前都很怕男人，接觸白只後覺得很親切。」
撰文：馮仁昭
from:
http://hk.apple.nextmedia ... 160308/19520199
