江湖猛人「上海仔」郭永鴻，最近因捲入富豪恩怨而成為新聞紅人，連帶他的戀事亦被翻出來重提，名單除了上海仔大前年公開講鍾意的徐子珊、賈曉晨及去年獲他現身賀生日的林芊妤（Coffee）外，還有上年被本報影到跟現年56歲、擁過百億身家的新加坡有婦之夫「肥叔叔」Low Check Kian攬啜錫的傅嘉莉。
現年31歲的傅嘉莉，入行多年雖然沒有代表作，但生於小康之家的她卻越來越富貴，有指她19歲簽約上海仔的娛樂公司時深得對方寵愛，上海仔還介紹她簽約林建岳旗下的寰亞電影，後來有傳上海仔發現她媾仔，最終被打回原形，其後簽約模特兒公司後，輾轉才加盟無線拍劇。而最近頻頻見報的上海仔，上月20日於半島酒店嘆茶時遇襲，事隔一星期他透過公關聯絡傳媒，原定大前日舉行「爆料記者會」，惟最後流會收場，之後亦再無其消息，有人甚至張貼尋人街招表示找到他有賞。本報記者昨聯絡傅嘉莉，她以短訊回覆：「唔係事實嘅嘢唔回應。」
上海仔（中）上月底在半島high tea時遇襲，出院後一直沒有蒲頭。
資料圖片
上海仔去年現身為Coffee慶祝生日，但Coffee指二人已沒聯絡。資料圖片
去年本報影到傅嘉莉在的士攬啜人夫「肥叔叔」，她死撐指是角度問題。資料圖片
Coffee：好耐冇聯絡
昨日本報亦聯絡上海仔最近期的緋聞女友Coffee，她表示：「其實都好耐冇聯絡過喇！都係最近記者問我回應先知發生乜嘢事！」問她可有擔心對方？Coffee即為上海仔送祝福：「我諗我應該唔會聯絡佢喇！但佢咁大個人，我諗都應該冇事嘅，今日已經係12月31日，希望個個人都平平安安，快快樂樂咁啦！」
有指Coffee自從獲上海仔陪過生日後緋聞未停過，問她可有新戀情公佈？Coffee笑說：「新戀情？唔會喇！都仲係自己一個，不過呢排見到好多人結婚，身邊朋友又生咗小朋友，都有幻想組織家庭，新一年新開始，咁都希望快啲搵到真命天子啦！」
採訪：小米、唐如
from:
http://hk.apple.nextmedia ... 160101/19434558
