大台台慶劇《無雙譜》搵咗黎耀祥、田蕊妮、岑麗香同黃宗澤等演出，翻拍1981年同名劇，講三個神話故事《易釵》、《陸判》及《追魚》，不過CG差到一個點，就係連強國網民都忍唔住問大台係唔係預算唔多！
昨日有內地傳媒開po話，「TVB電視劇特效遭吐槽」，聲稱有網民喺微博貼出一段《無雙譜》中特效場景，講岑麗香喺黃宗澤面前化身鯉魚精躍出水面，黃宗澤唔單止唔驚，仲展露笑容!仲有嗰個「似足小畫家畫嘅海底」……
CG效果似gif檔？嚇到唔少內地網民心都離一離，喺微博留言問：「沒想到TVB淪落到這地步，我笑了30秒。」又有網民問大台係唔係「預算不夠了嗎」。報道更形容呢套台慶劇特效粗製濫造，其實，唔止《無雙譜》被彈，早前稱特效使咗3000萬嘅神劇《張保仔》亦被網民話CG肉酸酸……慘不忍睹。
雖然話《無雙譜》嘅CG唔好咋，內容都幾充實嘅，連「普選」都敢講，有一幕講黎耀祥、田蕊妮同黃宗澤喺一間客棧傾偈，先講「君主應該由臣民選出」，又話「張兄，你這本書如果落在他人手中，你可能會被殺頭」，即吸引網民問：「原來法國盧梭的社會契約論係源自中國宋朝，真係失覺晒，小弟真係孤流寡聞!」亦有網民讚《無雙譜》當中《陸判》呢個故事，有份演嘅演員都做得好！
from:
http://hk.apple.nextmedia ... 151024/19345941
