今年成軍15週年的組合Twins，將舉行連串活動大肆慶祝，蔡卓妍（阿Sa）和鍾欣潼（阿嬌）再度合體，並於12月踏入紅館開紀念騷，年尾更會推出全新大碟。近日網上流傳一條Twins的預告片，兩人在片中濃妝艷抹，坐在車上塗唇膏搽粉扮靚，戴浮誇耳環襯烈燄紅唇的阿Sa，搽唇膏時更搽到飛出界變花面貓，十分搞笑。
【孖妹爭平板】
阿Sa（右）坐車時玩平板電腦，阿嬌見狀出手搶。互聯網圖片
【戴超做巨星】
臨近片尾，Twins齊齊戴上黑超，星味即現。
【15年前青春可人】
15年前Twins初出道時，不時以水著示人，記憶猶新。資料圖片
試片變預告
據知，Twins於下週一（18日）才會派新歌《LOL》，並於下月到台灣拍MV，今次曝光的是一條未完成的宣傳預告片，導演剪輯了一分鐘初版給工作人員先睹為快，怎知阿嬌擺烏龍以為是完成作，隨手將短片放上網宣傳，由於短片同時用了新歌初版做背景，無意間令未完成的新歌曝光，工作人員知道後都被嚇壞，急急通知阿嬌刪除，可是已有fans快手下載在網上廣傳。有看過短片的網友留言讚：「Twins返來囉，好聽！」有網友則嫌：「感覺這妝容把蔡太老化了！」
昨日記者向Twins瞭解，阿嬌在電話說：「條片唔係MV，而係teaser，條片點解流出呢，因為助手將link send畀我，我以為要發（派歌），興奮得滯就發咗出去，之後同事見到同我講，我即刻拿拿臨刪咗去，但冇法太多人睇到，不過冇嘢嘅，大家鍾意就開心。」
阿Sa昨日在微博上載與婆婆、媽咪及姨媽的合照，做個孝順女。
阿Sa則說：「其實呢段係預告片，唔係我哋嘅MV，首歌叫《LOL》，即係laugh out loud嘅意思，年底演唱會都係以開開心心為主題，所以預告片比較天馬行空，都係想幽默啲，希望大家睇完會笑嚇。」至於被網友嫌化妝老，阿Sa說：「初版啫，顏色全部都未整，大家睇埋完成版先再評論啦。」
採訪：皓騫
from:
http://hk.apple.nextmedia ... 150511/19142822
