栢芝拍戲耍大牌開罪向華強夫婦後，最近連馬楚成也對其死心，放棄邀她演《星願》續集。資料圖片
張栢芝近期因演出《3D封神榜》耍大牌，遭中國星老闆向華強下封殺令，該公司將永不錄用她。不過在一片負評聲中，諸葛紫岐與馬楚成仍願意請她拍片，但事情又峯迴路轉，有傳栢芝合約條文經常變來變去，臨簽約前又要求再提高片酬，外景又要改去新加坡拍攝，投資者不勝其煩，最後決定放棄請她演出。
臨時加五百萬
馬楚成憑執導《星願》成名，他一直想開拍續集令事業再創高峯，最近他得到橙天嘉禾支持，準備今年8月開拍續集《星語心願之十一天零一夜》，女主角依然是栢芝，雙方原本已達成合作協議，但有消息指栢芝要求收一千萬酬金，電影公司覺得很貴，不過導演很想用她，最後都答應。但當催速栢芝簽約時她又臨時變卦，說要再加五百萬才肯接拍，而且拍攝地點要由內地改去新加坡，以便照顧兩名兒子，這次激嬲了電影公司和馬楚成，決定飛起她。由於目前導演心目中沒適合人選代栢芝，所以影片會暫時擱置下來。
一向很支持栢芝的馬楚成，三年前便曾合作《極速天使》。
栢芝當年憑《星願》大紅，如今拍續集卻條件多多，嚇怕資方。劇照
栢芝與兒子居於新加坡，常被「捕獲」。微博圖片
記者昨日聯絡馬楚成，問他《星願》續集是否要飛起栢芝？他說：「年初同栢芝傾過，但其實都未傾實，唔係落實要搵佢做呀！我自己都冇話一定要開拍呢部戲，𠵱家我決定先搞《巴黎攻略》，呢部片投資過億元，好大製作，我都要花多啲心思去籌備，所以暫時唔搞《星願》續集啦！」
諸葛紫岐被栢芝經理人指博宣傳，有傳激怒諸葛，決定飛起栢芝。資料圖片
諸葛未敢定案
問是否給栢芝的合約條件嚇怕？馬楚成說：「我個人唔喜歡落井下石，佢同向生向太嘅恩怨，我就唔會理，話我一定會開拍《星願》續集係美麗嘅傳說，女主角諗過好多人，𠵱家一切都未落實嘅，今年應該唔搞住啦，所以唔會諗搵乜人選。」
至於被栢芝經理人Emily指摘藉機宣傳的諸葛紫岐，昨日問她新片是否要飛起栢芝，她透過星韜娛樂總經理Mac說：「𠵱家唔可以話百分百要搵栢芝拍戲，或百分百唔搵佢拍戲，我原本係同佢經理人公司新亞洲傾緊嘅，係老闆同老闆之間對話，但結果搞出咁多是非，我都唔想答咁多佢嘅嘢。」
問向華強太太陳嵐對栢芝再度被飛出局有何意見？她說：「我早已對佢心死，佢嘅嘢已經唔關我事。」
採訪：鍾國仁
from:
http://hk.apple.nextmedia ... 150407/19103281
