由彭浩翔執導、黃曉明同周迅主演嘅《撒嬌的女人最好命》下個禮拜四開畫，呢幾日假期就上緊優先場。睇過呢部戲嘅觀眾都話部戲可以話係內地版《春嬌與志明》，諗唔到志明余文樂真係走咗去客串。樂仔客串嗰場戲好搞鬼，話說呢場戲係講周迅拍黃曉明酒店房門，刷緊牙嘅曉明走去開門，點知刷牙開門嘅人變咗係樂仔，周迅完全估唔到樂仔會入鏡，所以即時嚇一跳，而全場笑爆。
劇情本來係周迅拍黃曉明酒店房門，由刷緊牙嘅曉明開門（右圖），但突然間開門嘅人變咗係余文樂！
票房贏《太平輪》
噚日問樂仔點解會客串，佢話：「當時《撒嬌》喺上海拍外景，我又咁啱喺上海拍《閨密》，所以得閒就去探班，咁阿彭就捉咗我客串扮曉明演嘅角色小恭，當時一開門見到周迅個驚訝表情，我、曉明同阿彭都忍唔住大笑，真係好好玩。」呢部戲其實早已經喺內地上咗，票房約2.3億人民幣，小成本撼贏咗吳宇森套3億元大片《太平輪》，《太》片約收1.9億票房。
撰文：馮仁昭
馮仁昭
from:
http://hk.apple.nextmedia ... 141225/18980379
