韓風吹襲，人人放假都話要去韓國，淨係今個4月已經有5萬5千港人遊韓，破曬紀錄。你仲係去首爾、釜山、濟州？周圍都係講普通話的店員，不如去尖沙咀韓國街好過！首爾去到熟曬路，向外闖，環抱著首爾的近郊京畿道係首選，既有城市的氣息，又不失鄉郊的寧靜。由首爾向東行有楊平郡，相機形的café夠曬搶鏡，吸引港星去拍廣告；向北行有高陽市，4月開幕的Aqua Planet將水族館及動物園合而為一，潮媽又多個藉口帶埋囝囝出遊。向南行有城南市及利川市，咖啡街靚到韓劇都去取景，梗係要去嘆番半日。最重要係，韓劇和廣告的取景地多數在京畿道。去韓國旅行，當然要順便追尋嚇Oppa嘅蹤跡，你懂的！
Dreamy Café依照這款Rolleixflex TLR設計，是店主朴先生最愛的相機。
楊平郡烏托邦追夢Café楊平郡是京畿道內最大的郡，位於首爾市東面，搭地鐵一個多小時，一條線直達，非常方便。在楊平郡中元山附近，去年7月出現一部巨大相機，面世無耐即上法國攝影網站，吸引攝影發燒友登門造訪。其實相機形建築物是一間café，朴先生兩夫妻用上六年時間籌備，二人是居於首爾的軍人，發現自己為兩餐營營役役，毅然決定放棄大城市生活，到鄉郊追尋夢想。太太想開café，先生鍾意攝影，混合兩種元素就成為呢間Dreamy Café嘅概念。Café樓高兩層，一樓放滿朴先生的相機珍藏，對攝影機發燒友嚟講，簡直好似博物館一樣。至於二樓展示朴先生的作品，以及各種各樣的攝影集，可以嘆住咖啡欣賞風景影嚇相，頓時忘卻生活煩憂。朴先生兩夫妻希望Dreamy Café可以激勵城市人唔好放棄夢想。離開城市，去到靚café除咗打卡之外，和店主傾傾偈，發發白日夢也好。
café內以白色及木傢具為主，一邊嘆咖啡一邊睇書影相，寫意不過。
朴先生將珍藏放於玻璃櫃內，至少有三十部相機，不過眼看手勿動。
朴先生兩夫妻非常友善，而且英文流利，唔識韓文都唔使擔心。
café內的餐牌由太太親自設計，用先生的作品做裝飾，特別溫馨。
除了室內佈置，就連茶具都非常講究，茉莉花茶（$37）用小紅帽茶壺，得意到唔捨得飲。
Dreamy Café地址：京畿道楊平郡中元裡341-13電話：+82 31-771-3264網址：
https://www.facebook.com/cafedreamy
交通：乘地鐵中央線於龍門站下車，再搭乘計程車約需15分鐘
踩Rail Bike上龍門山楊平郡主打環保生活，保育做得好，其中龍門山係一大景點。龍門山附近有由舊鐵路改建而成的Rail Bike，係近年熱門玩意。其實韓國各地有好多Rail Bike，楊平呢條路線好在唔太長，全長3.2公里，來回只需約個半鐘，對於缺乏運動的香港人來說，起碼唔會踩到腳軟。沿途可以欣賞到黑川的自然風光，秋天更會有紅葉睇。不過要注意Rail Bike每個半鐘出發，記得夾準時間，唔係有排等。玩完Rail Bike，可以去埋附近的龍門寺，寺內有一棵銀杏樹，樹齡過千年，被推斷為亞洲最古老的銀杏樹。相傳由高麗時代開始，無論經歷任何戰爭，銀杏樹都屹立不倒，因此被韓國人稱為守國之樹。
由Rail Bike望出去可以見到龍門山，靚唔靚見仁見智，至少空氣都清新啲。
銀杏樹高42米，係韓國的國家天然遺產之一。
楊平Rail Bike地址：京畿道楊平郡龍門面三星裡126-5電話：+82 31-775-9911網址：
http://www.yprailbike.com
交通：乘地鐵中央線於龍門站下車，再搭乘計程車約需5分鐘開放時間：9am-9pm（於固定的時間出發）費用：4人——$211/ 2人——$146
追星熱點《一線鍾情》：The GreemThe Greem本來係一幢私人別墅，因為多次借出成為拍攝場地，屋主索性開café做生意。歐陸風的建築及庭園，喺《屋塔房王世子》、《瑪麗外宿中》等劇都用作有錢人屋企，新鮮滾熱辣有《Dr.異鄉人》同李敏鎬主演的內地網劇《一線鍾情》。地址：京畿道楊平郡玉泉面龍川裡564-7電話：+82 10-9571-1914網址：
http://www.thegreem.com
交通：乘地鐵中央線於龍門站下車，再搭乘計程車約需5分鐘
《花樣男子》：楊平英語村2009年成為《花樣男子》的拍攝場地，當中F4讀書的貴族學校就喺呢度取景，佢哋上堂嘅課室拍攝完之後保持原貌，李敏鎬fans必去朝聖。地址：京畿道楊平郡龍門面延水路209電話：+82 31-770-1300網站：
http://www.yea.or.kr
交通：乘地鐵中央線於龍門站下車，再搭乘計程車約需10分鐘入場費：免費
高陽市Aqua Planet一次過睇曬海陸動物由首爾向西行的高陽市，是京畿道近年重點發展的新市鎮，其中大型商場One Mount去年於一山區落成之後，吸引好多海外遊客。今年4月，商場旁的Aqua Planet開幕，令整個地區更加旺。Aqua Planet係首都圈最大規模的水族館，樓高4層，面積超過十三萬呎，其中館內最大的水槽Deep Blue Ocean，高6米闊12米，猶如置身海底之中。除咗睇海洋生物，水槽內每日會上演5場「Aqua Dream」表演，三位潛水員於水槽中，配合音樂同影像，同海洋生物共舞，無論大人定小朋友都睇到嘖嘖稱奇。Aqua Planet另一賣點，係將水族館同動物園二合為一，睇完水母、海象、企鵝等之後，進入森林世界，仲有鸚鵡同老虎睇，可以玩足一個下晝。溫馨提示，最好避免週末同韓國本地人一齊逼，平日去無乜人可以慢慢玩。
Deep Blue Ocean水槽就好似一個電影大銀幕，每場表演13分鐘，正過睇Imax。
水族館內有不同區域，可以讓小朋友親近大自然，接觸海洋生物。
動物園區相對較細，雖然無水族館咁吸引，但依然人頭湧湧。
入口以半圓形的水母水槽迎賓，配合五光十色的燈效，必影位之一。
追星熱點
新韓流宣傳館一山湖水公園入面，有一個新韓流宣傳館，展示多年來於高陽市取景的電視劇，香港人熟悉嘅有《夢想高飛》、《漂亮男子》、《總理與我》等。追景點之前先去一去呢度，認清地方先重點出擊，就唔怕去錯地方搵唔到。新韓流宣傳館地址：京畿道高陽市一山洞區湖水路595（一山湖水公園內）電話：+82 31-908-3236網址：
http://www.visitgoyang.net
交通：乘地鐵3號線於鼎缽山站下車，1號出口步行約15分鐘時間：10am-6pm（逢星期一休息）入場費：免費
《來自星星的你》：一山湖水公園一山湖水公園係一山區地標，人工湖面積達2.7平方公里，整個公園種滿20萬棵不同品種的樹木，咁靚嘅風景，唔少韓劇都嚟取景，《來自星星的你》金秀賢咪就係喺呢度跑步囉。一山湖水公園地址：京畿道高陽市一山洞區湖水路595網址：
http://www.lake-park.com
交通：乘地鐵3號線於鼎缽山站下車，1號出口步行約15分鐘
城南市星蹤咖啡街城南市接壤首爾南面，搭地鐵由首爾出發只需半個鐘，但係遊客較少，名副其實的慢活城市。韓國出名café多，城南市特別多，有一條百峴洞咖啡街，街頭行到街尾有大約二十間café，全部各有特色。當中人氣最旺係街頭的I'm Home，論裝修擺設，未必係最靚，都係多得《來自星星的你》，金秀賢只係踩單車經過，已經令café一夜成名。I'm Home地址：京畿道城南市盆唐區百峴洞578-8電話：+82 70-4418-0415交通：乘新盆唐線至板橋站2號出口，沿延大路步行約20分鐘。時間：10am-12mn
《來自星星的你》於I'm Home前取景，歐陸風建築簡約，仲有露天位方便愛狗人士。
百峴洞咖啡街沿途種滿鮮花綠草，就算外賣坐出面飲都好寫意舒服。
Ice Flakes with Matcha$73I'm Home最出名係鉋冰，推介綠茶味，甜而不膩，仲好夠份量，一大碗兩個女仔都食唔曬呀。
CaféCuisson豪裝café加餐廳，英倫式的裝修加擺設，配high tea一流。晚上可以上二樓食西餐，一樣咁好feel。地址：京畿道城南市盆唐區百峴洞578-1電話：+82 31-8017-9793
Vegabox主打以蔬菜為主的飲品，最啱注重健康的素食人士。店內有有機菜的種子賣，試過好飲可以返去自己種。地址：京畿道城南市盆唐區百峴洞577-3電話：+82 70-7709-4113時間：11am-11pm
Coffee King外形十足貨櫃，以別具一格的藝術品裝飾，行入去才知別有洞天，樓底高夠開揚，當然亦可以選擇坐喺貨櫃入面。地址：京畿道城南市盆唐區百峴洞581-7電話：+82 31-8016-6176時間：11am-11pm
有用資料
有用資料簽證：持特區護照或BNO均毋須簽證機票：HK Express每天有兩班直航往返香港及仁川機場，可選7:25am或9:50pm出發，回程則為4:20am或12:55pm。單程機票由$620起，未連機場稅、燃油附加費及相關稅項。網址︰
http://www.hkexpress.com
時差：比香港快1小時貨幣：1,000韓圜約兌$7.3港元。（文中價錢以此匯率計算）交通：楊平郡：由首爾乘地鐵中央線至龍門站，車程約1小時10分鐘。高陽市：由首爾乘地鐵3號線至注葉站，車程約50分鐘。城南市：由首爾乘新盆唐線至板橋站，車程約30分鐘。上網：維訊數據的韓國高速Pocket WIFI借用服務，先於香港租借，到埗即可連接4部裝置，價錢每日$60。網址︰
http://www.visondata.com
建議行程
利川樂天outlet
遊京畿道最少要5日，以首爾為中心點，頭三日向不同方向出發，daytrip來回，不用搬酒店較方便，最後兩日可以留在首爾血拼，記得去京畿道利川市最大的樂天outlet shopping。上年年尾才開幕，多個韓國潮流品牌如Bean Pole，Lucky Chouette，tasse tasse等等都有分店駐場，鍾意掃平貨的香港人千祈唔好錯過！第一天：到埗→城南市咖啡街→首爾第二天：首爾→高陽市一山湖水公園→One Mount→Aqua Planet→首爾第三天：首爾→楊平郡龍門山及Rail Bike→Dreamy Café→The Greem→首爾第四天：首爾→利川市樂天outlet→首爾第五天：首爾→香港鳴謝：韓國觀光公社、京畿觀光公社、楊平郡、HK Express、維訊數據
撰文：關錦雯攝影：胡春輝模特兒：Pauline Tan
