謝安琪（Kay）去年與舊東主環球唱片被指意見分歧，最終在火藥味中提前解約過檔星煥國際。本以為樂壇冇永遠敵人，怎料Kay離巢後推出首張國語碟之際，環球除吼準時機推出精選碟搶銷量，更取巧以Kay新歌《最好的時刻》作為碟名，製造「新歌碟」假象。被剃眼眉的Kay經理人夏森美即時反擊環球抽水，雙方關係再次勢成水火。
謝安琪表面與環球和平分手，怎料過檔星煥近一年又再掀是非。
Kay於2006年加盟環球唱片，起初集萬千寵愛於一身，為她推出多首如《囍帖街》等金曲，極速上位做小天后。不過人紅自然多是非，自去年初開始傳出Kay的經理人夏森美與環球高層黃劍濤意見不合，最大原因是不滿環球對當年新加入的吳雨霏投放大量資源，相反對Kay的宣傳工作則放軟手腳。最終雙方在去年中正式宣布提前解約，結束六年的賓主關係，Kay亦成功空降新公司星煥國際做「一姐」。
歌迷中伏
雖然表面是和平分手，但這片戰火在今年再度燃起。Kay過檔約近一年後，於上月推出頭炮國語碟，環球似乎有心作對，對Kay進行「碟」影狙擊，在同期推出翻炒Kay舊歌的精選碟打對台，公然搶生意。雖然歌手過檔出新碟，舊公司乘機推出精選碟屬等閒事，陳奕迅、梁漢文及吳雨霏等亦早有前科，但今次最弔詭的是，環球竟抽水抽出面，公然將Kay過檔後的新歌《最好的時刻》作為精選碟碟名，但碟內卻沒有收錄該歌曲，令不少Kay迷被誤以為偶像出了全新廣東大碟。
對於環球出精選碟撞期兼撞名，不少網民大呻被誤導而中伏。有人留言說：「好似有啲衰，用人哋歌名。」、「用人哋隻歌名出自己碟，環球你好嘢。」更有激進網民用英文粗口鬧爆環球。夏森美昨日在電話得知此事後亦開腔怒轟環球抽水：「我好同意網民睇法，真係有抽水之嫌，因為碟入面真係冇首新歌。（覺得環球咬住唔放？）我冇咩所謂，外面嘅人睇得好清楚，網民眼睛係雪亮。」而被指抄歌名的環球唱片助理總經理譚先生亦反擊說：「佢哋有冇copyright先？啲人要含沙射影我都冇辦法。」
互相宣傳
Kay現任唱片公司老闆何哲圖則稱：「每間公司都有政策，歌名好先會有人用，當係互相宣傳。（覺得蝕底？）唔覺，呢首歌都未出碟，將會喺年尾推出。」另外，Kay日前拍攝MV時上演一幕流淚戲時棄用眼藥水大騷演技，靠憶起亡犬而谷出真眼淚。
from:
http://orientaldaily.on.c ... /00282_001.html
