颱風天兔襲港，無綫節目《星夢傳奇》噚日下晝如常錄影，不過劇集《M Club》、《愛我請留言》同《點金勝手》噚晚廠景全取消。無綫將軍澳電視廣播城亦做咗防風措施，佈景板通通綁好，保安亦戴上頭盔。
前晚錄影嘅一集《星夢》，有趙希洛同歌手出身嘅周子揚挑戰，但最終被叮走，鄭俊弘、陳明恩、羅鈞滿、姚兵同葉暐繼續有得留低。「高分王」鄭俊弘之前輸過畀陳明恩，前晚佢唱英文歌再以180分贏番第一位，今次錄影鄭俊弘嘅師傅巫啟賢唔喺度，佢表現冇咁緊張，講到上次師傅畀佢低分，服唔服呀？鄭俊弘話：「當然服！」陳明恩就話贏過一次最高分已經好滿足。
《星夢》錄影，鄭俊弘、陳明恩同羅鈞滿等有得留低。鄭俊弘前晚唱贏陳明恩，重奪「高分王」之位。攝影：黃曉妍
嘆冇人買碟
評判郭偉亮講到專欄作家李純恩話樂壇已死，佢話：「創作嘅嘢好難批評，要整爛好易，建立就難，死唔死冇人知，死後重生又得，死咗又得，只係𠵱家氣候對音樂唔重視，冇人買碟支持啫。」
from:
http://hk.apple.nextmedia ... 130923/18433803
