憑《星夢傳奇》一夜成名嘅鄭俊弘，週日（14日）第二集《星夢》以一首〈Angels〉繼續衞冕最高分，更連接兩個收錢騷，踏出有名有利第一步。
不過鄭俊弘唔只星途多波折，原來身世亦坎坷，自小由外公、外婆湊大，媽咪則長期喺溫哥華生活，鄭俊弘現時只與胞姐在港相依為命。與父親關係疏離，鄭俊弘亦親口承認：「一直都係公公、婆婆照顧，同爸爸好耐冇見喇，冇話特別想去見佢！」
29歲鄭俊弘霉足12年，今年終於喺《星夢傳奇》一唱成名。週日（14日）播出第二集《星夢傳奇》，他轉唱英文歌，以Robbie Williams的〈Angels〉出戰，繼續做冠軍。其間訴說自己同外公、外婆嘅往事，講起公公是他「心目中嘅英雄」、「見唔到佢最後一面」時，更一度悲從中來泣不成聲，真情告白贏盡掌聲，亦令人得知新歌王嘅家庭生活並不圓滿。
好耐冇見佢喇！（真實對白）斯文大眼仔鄭俊弘基本上問乜都答，但當記者問及同爸爸嘅關係，鄭俊弘即表現尷尬不欲多談。
《蘋果日報》圖片
鄭俊弘第二集以一曲〈Angels〉，以174.5分再度成為冠軍，之後鄭在台上邊哭邊說：「我冇機會見（外公）最後一面，好憎自己。」
借呢個機會，將呢首歌送畀我外公聽，因為我當佢係我嘅angel，覺得佢一直守護住我、保護我。
因為佢幾年前去世，公公由細湊大我，我𠵱家所有做人嘅原則、道德標準全部都係公公教我嘅，佢係我嘅榜樣，佢係我嘅英雄，佢過身嗰陣我喺香港，我冇機會去見佢最後一面，我好憎自己，嗰晚我好嬲，好憎自己。
我呢世咁大個仔冇送過乜嘢畀佢，所以希望今晚可以將呢首歌送畀佢。
消失的父愛鄭俊弘自細在加拿大長大，於溫哥華Eric Hamber Secondary School讀書，其間由外公，外婆湊大，媽媽在加拿大當地產經紀，而鄭同父親關係疏離，好彩他在6歲開始學蔡李佛，令鄭俊弘除咗識功夫，亦透過師父的關懷，補償了消失的父愛。他之後亦開始學習國術，15歲那年更在西雅圖武術大賽攞冠軍，唔只唱得仲打得。
唱得又打得的鄭俊弘，01年參加「新秀」大賽連奪3獎，後來華星執笠，他03年簽無綫捱足10年，05年曾經被監製梅小青睇中，07年在《法政先鋒II》飾演蒙嘉慧細佬，以為可以脫離大茄行列，但可惜自該套劇後，鄭俊弘再遇低潮，做回跑龍套角色，當時其母就叫他返回加拿大做華人警察，難怪他說：「我冇同佢哋講我參加咗《星夢》，怕佢哋太緊張……又怕佢哋覺得我為咗音樂浪費太多……冇好好發展自己嘅事業。」
15歲武術冠軍6歲開始習武，之後更學埋國術，仲喺15歲時攞到西雅圖武術大賽冠軍，認真威水。
23歲雖然無緣出唱片，不過鄭俊弘依然繼續爭取唱歌，閒時都會喺政府騷表演。
7歲雖然自細由公公婆婆喺溫哥華湊大，母親於當地做地產經紀，但據知單親的鄭俊弘家庭經濟其實算唔錯，7歲時仲有馬騎。
17歲選新秀01年喺「全球華人新秀歌唱大賽」連攞3獎，可惜簽約華星不久，華星就結業，鄭慘變孤兒仔。《蘋果日報》圖片
鄭俊弘真情表白，打動評判之一的巫啟賢，令巫啟賢當眾說：「你唔好演戲喇，做歌手啦，7月我在香港開個唱，嚟我演唱會做嘉賓啦！」《蘋果日報》圖片
窮band義唱換酒鄭俊弘唱得，連《天與地》監製戚其義都知，之前《天與地》宣傳時，戚監製專登搵佢同劇中演員如羅鈞滿、張景淳夾band，現實中鄭亦跟好友自組樂隊「Home」，但出騷冇錢收，兩支啤酒當酬勞。
鄭俊弘彈得唱得，喺電視城已不是秘密，當年《天與地》監製戚其義𥄫中，就搵佢飾演劇中陳豪其中一位band友，仲喺結局戲同陳豪同台演出。
鄭俊弘除咗獨唱了得，本身亦係band仔一名，更自組樂隊Home。喺自己YouTube頻道亦有上載表演片段。
奀路GPS
'13《師父．明白了》
'13《初五啟市錄》
'12《幸福摩天輪》
'12《大太監》
'12《天與地》
'11《紫禁驚雷》
'11《女拳》
'10《拳王》
'10《洪武三十二》
'09《老友狗狗》
'09《學警狙擊》
'07《學警出更》
'06《法證先鋒》
'05《胭脂水粉》
'04《青出於藍》
'04《心花放》
環球睇中想簽直至《星夢》鄭先彈起，雖然暫時未有唱片公司正式接洽，但據知已有唱片公司如環球等𥄫中，有機遇伯樂。
週日（14日），繼《星》播出當日的首個賺錢戒煙騷有5千蚊外，他再有騷錢賺，於活動中唱兩首歌穩袋一萬蚊，加足1倍，另外亦落實參與《星夢》一直給他高分正評的評判巫啟賢，在下週五（26日）香港的演唱會做嘉賓，更有獨唱部分，總算好開始。
對於同父親關係，鄭俊弘亦自直言關係一般，他說：「我好耐冇見過佢喇！一直都係公公，婆婆照顧囉！（同爸爸關係點？）唔識講，好彩師父（國術師父）、舅父、公公都畀咗父親嘅形象我囉！少咗爸爸，我諗唔多唔少有影響，但我真係唔知……（𠵱家出咗名會唔想見佢？）冇話特別想見佢……不過咁講好似唔係咁好！反而媽媽話好開心，佢話我終於有啲成績，叫我繼續努力！」
鄭俊弘雖然上咗位，不過依然平民化，更被指戶口曾經剩番50蚊，所以出入依然搭地鐵，發完星夢繼續面對現實。
上週嘅戒煙騷屬於《星夢》播出前接落，只得5千蚊酬勞，鄭俊弘話：「有得唱有觀眾聽就得喇！」
週日（14日）鄭俊弘再接收錢騷，據知酬勞有1萬蚊，佢當日唱咗鄭中基〈我真的可以〉及王力宏〈此刻•你心裏想起誰〉！
秘拖姜麗文
鄭俊弘同姜麗文喺加拿大時候已認識，最近被指二人秘密拍拖兩年，不過鄭俊弘話：「佢只係我best friend！」《忽然1周》圖片
鄭俊弘說在07年時，曾經諗住放棄做茄喱啡返加拿大，幸得女友姜麗文父親秦沛鼓勵先打消念頭。
阿媽兩度阻入行 李璧琦反叛全裸
第三集玩完現於伯樂音樂學院教唱歌，學費收800蚊一小時，李璧琦估不到她在第三集便失手被out，週一（15日）她說：「我有個高音位唔太準確，我有啲失落啦！」
《星夢》除咗鄭俊弘，李璧琦喺第二集唱歌劇一鳴驚人都算係另一焦點，原來李璧琦早在17歲參加新秀比賽已有機會入行，卻因阿媽阻止而告吹，母女關係更一度惡化。
睇住同屆新秀的何韻詩近年愈撈愈掂，谷足17年的李璧琦終於有機會爆發，但可惜李璧琦發圍只此一集，到本週第三集時唱李克勤的〈大會堂展奏廳〉竟被out出局，難怪佢心情勁低落。
母女關係惡劣據知當年李璧琦跟母親關係一度惡劣，雖然母親堅決反對入行，但反叛李璧琦，反而曾隻身到新加坡做model，當年更為屈臣氏蒸餾水拍下一輯全裸廣告，之後再在朋友介紹下入TVB及明珠台做司儀，等足17年，李璧琦終於可在《星》節目獻唱，初露鋒芒。李璧琦週日（14日）在電話接受本刊訪問：「媽咪想我讀法律，但係我想唱歌，所以大家關係唔太好，到07年時，媽咪先開始支持我，大家開始改善關係。」
可惜週日（14日）李璧琦再戰第三集時，唱出評判李克勤首經典歌〈大會堂演奏廳〉時，卻不幸跟出名唱得差的梁烈唯齊齊被out，據知李的心情跌落谷底。週一（15日）落敗李璧琦承認：「我有啲失落啦，校長（評判譚詠麟）話因為我教人唱歌，所以要嚴格啲喎，我只能夠講我係犯咗錯，人哋冇囉！」
李璧琦早年因同母親關係差，毅然隻身赴新加坡做model，曾接拍一輯全裸的蒸餾水廣告。
水着回帶
家陣李璧琦hit咗，連去年佢幫TVB拍的一輯水着宣傳廣告都被網友回帶重睇，網友更讚佢唱得兼身材正。
校花冠軍
2000年李璧琦再次不理母親反對，參加當年的《壹本便利》校花選舉，更成為冠軍。
兩失機會
除96年參加新秀，99年已讀浸大聲樂系一年級的李璧琦，參加由TVB和bma合作的《一班人歌唱大賽》奪冠，更獲bma老細羅傑承賞識想簽做歌手，可惜最後因母親反對而告吹。
未死得晒第二集《星夢》收視冇升跌，平均21點，out走袁偉豪和張景淳，本週第三集只准唱評判名曲，被out名單輪到李璧琦同唯唯，但據知無綫已準備安排復活戰，出局隨時可以翻生。
In
何傲兒〈情人知己〉《蘋果日報》圖片
張振朗〈幻影〉《蘋果日報》圖片
貌似Bosco的張振朗為力捧新人，早前在《心路GPS》飾演李司棋兒子。
Out
梁烈唯〈愛情陷阱〉
李璧琦〈大會堂演奏廳〉
