上月喺巴黎舉行完浪漫婚禮，陳豪同陳茵媺一個留港搵奶粉錢、一個就赴加拿大多倫多娘家安胎。被迫分開一個月，係時候重聚。
本週三（17日），正是小兩口在多倫多設宴招呼雙方家人的雙陳喜酒大日子。除了要準備喜宴同陪老婆仔產檢，陳豪今程最大任務，就係親自向親朋戚友公布陳B性別……各位觀眾，可靠消息，雙陳一索得男，可喜可賀。
新婚兼做老豆雙喜，陳豪呢期去到邊笑到邊，繼上月出發巴黎完婚前笑到抹汗，週日（14日）出席商場活動時，又再笑到見牙唔見眼。被記者問到老婆陳茵媺佗緊B仔定B女，仲心情靚到抽番自己水，話要：「等朕check吓！」陳豪check完唔肯講，不過據知情人士透露，懷胎踏入第四個月，Aimee佗住係男嬰。
週三（17日）多倫多擺酒，陳豪週一（15日）至完成手頭工作離港，陳豪見到在場記者再次開心笑到面紅。
陳豪話媽咪一早身在多倫多、又無需為老婆在港購置物品，所以週一離港時行裝輕便，得胞兄陪住上機。
上月12日，陳豪、陳茵媺的巴黎婚禮只得雙方父母及極少數親友獲邀，為氹外父外母，陳豪專登再飛多倫多補擺喜酒。
就晒外家拍拖兩年結成正果，陳氏伉儷確係啱key，一致高調晒幸福、低調擺喜酒，再三強調唔會在港搞婚宴招呼圈中人。
不過後生仔女旅行結婚ok，老人家就未必ok，有傳陳父便因此「詐型」，好女婿陳豪當然識做補飛，鐵定本週三於多倫多，陳父經營的酒家麗晶酒家補擺喜酒。「Aimee安胎要留喺嗰邊方便父母照顧，陳豪又要留喺香港做埋啲工作，所以酒席詳情都交晒畀Aimee同爸爸安排。今次主要係請Aimee加拿大親友食餐飯。」知情者說。
陳豪忙搵錢、Aimee留家安胎，雙陳喜酒所有事宜都由陳茵媺父母話晒事，連地點都揀在陳父經營的酒家。
喺香港間茶餐廳叫麗晶，Aimee父親陳炎燊對「麗晶」兩個字情有獨鍾，名下多倫多酒樓亦叫麗晶。網上圖片
陳父的麗晶酒家在多倫多華人社區相當出名，最多華人揀來做中式囍宴，至於食物亦具水準，不少當地華人在微博分享。
宣布佗仔
有傳陳茵媺會喺多倫多嘅North York General Hospital生豪B，當年梁洛施都係喺呢間醫院生長子。而茵媺由於係加拿大籍，所以喺加拿大生仔只係需要畀醫生費，估計10萬港幣都唔使。
據悉陳豪此行最重要事宜亦包括陪Aimee接受產檢、與婦產科醫生會面。話就話老婆未決定留加定返港生B，其實Aimee自己喺多倫多長大、父母又長居當地，4月懷孕至今都留在父母身邊，生仔亦順理成章會揀多倫多。而早在月初，接受例行產檢時，Aimee已經獲悉佗緊B仔，兩公婆正好藉着喜酒當晚向親友宣布喜訊。
週一（15日），陳豪在胞兄陪同下到達機場，對住在場送機傳媒繼續好心情，不過笑得開心，把口一樣密：「我媽咪一早飛咗過去啦，Aimee ok，都冇咩要我帶，嗰邊乜都有。其他嘢就唔講啦，都係想低調啲。」
筍盤擺酒生仔咁大件事，想低調，好難喎！
影樣唔影肚巴黎行禮後，Amiee相隔半個月才更新微博，話自己心情似係陽光一樣咁燦爛，不過就好巧妙咁只見樣唔見肚。
4 Job2百萬受師奶、OL歡迎，形象又夠穩重專一，陳豪騷價一向在TVB小生榜穩佔頭三位，去年一個商業活動起表價10萬，今年雙喜臨門水漲船高加至25萬，一樣搶手。新婚至今短短一個月，接咗4個job就輕鬆袋2百萬，好搵過拍劇多多聲！
