現年42歲嘅洪欣近日俾讀者報料話佢已經懷孕14周，咁啱前日下晝約4點，佢同老公張丹峰及另一男性友人喺中環置地廣場嘆下午茶，素顏兼一身便服打扮嘅洪欣，坐低後見佢肚凸凸，又點橙汁飲，三個人好悠閒咁傾偈，洪欣冇受爸爸欠債嘅事影響心情，好開心咁講到指手畫腳。
著曬平底鞋嘅洪欣，同老公去攞車時行得好慢，同以前好唔同。
同老公、朋友嘆下午茶時，洪欣雙手放喺小腹度，唔通想掩飾有喜？洪欣同老公撐完枱腳走嗰陣，張丹峰好細心扶一扶老婆。
拖實過馬路摸肚
傾到大約5點，個男性友人嘅女伴嚟埋，冇幾耐就兩個一齊走，剩低洪欣同老公撐枱腳，坐多陣後，張丹峰就埋單，洪欣喺離開前先去洗手間，但平時行得好快嘅佢前日行得特別慢，又著住平底鞋。其後兩公婆齊齊行去長江中心攞車，途中張丹峰拖實洪欣又幫佢攞埋手袋，過馬路時洪欣仲不經意摸咗個肚一下，跟住就坐張丹峰揸嘅銀色平治返歸，真係似乎有咗。
拖實老公張丹峰過馬路時，洪欣不經意輕摸咗個肚一下（箭嘴示）。已有一子嘅洪欣，一家樂也融融。
「係嘅時候會講」
洪欣09年同細佢11年嘅內地演員張丹峰結婚後，兩公婆好鬼恩愛，但未有所出，就將佢同莫少聰生嘅囝囝莫鎬廉改名張浩鋒。記者致電洪欣查證，唔知係咪始終未陀得穩唔方便講，洪欣否認懷孕，但係話：「係嘅時候會講畀大家聽。」
from:
http://hk.apple.nextmedia.com/entertainment/art/20130711/18329939
