一屋特技狗睇電視瘦身廣告，見到隻白色貴婦狗陪唐寧齊齊做瑜伽，狗仔細細，俯臥、倒立瓣瓣掂，厲害到俾網友懷疑係電腦特技！其實貴婦狗仔Milu唔算最犀利，最勁嗰隻係Milu阿媽Nikki，識踩滑板、直立或倒立前行、繑手攞棒棒——講緊係狗仔已經盲咗，仍然輕易做到以上動作。
咁猛料，因為有個訓犬師主人李德良，係香港犬隻訓練總會訓練總監，佢仲話訓練狗仔特技，唔係想栽培佢哋做廣告明星，其實係為咗狗仔可以保護自己！
幫牠入戲
無花無假，當日即興表演，由Milu做攝影師，扮同Dolby影廣告。睇住主人阿良用食物放喺部攝影機度，同Milu練一陣已經埋位拍得，快過沖杯麵。
最大隻的黑白色邊境牧羊犬Dolby，拍過京都念慈菴廣告。中間的Nikki拍過電訊盈科、益力多、Dove廣告。最新上位的Milu，拍過康力施洛和保柏廣告。
阿良的三隻明星狗：大狗邊界牧羊犬Dolby，母子檔貴婦犬Nikki和囝囝Milu，加埋拍過十幾套廣告和電視劇，長拍長有，有咩絕招？「去到現場，先掌握狗仔要做的動作和行走路線，即時同牠排戲。例如將食物放在目標點上，引狗仔去拿，一邊下達動作指令。」如果動作複雜，就將指令拆散，例如跳圈，先run再jump最後finished，令狗仔更易掌握配合。
唔係演嘢
有養狗的唐寧盛讚Milu好叻好乖，第一次同寵物拍攝咁順利和極速完成。
有人話，教狗做特技是虐畜，阿良斥責想法太膚淺。「狗仔不是與生俱來識做動作，簡單如跳起、落地，唔教未必做得啱。」例如好多狗仔跌落梳化搞到盤骨受傷，阿良的狗仔因為受過訓練，無出過事。最經典例子係盲眼狗媽Nikki，兩年前牠患上白內障，不但無驚無亂，仲做到特技，生活如常。「全靠曾經訓練牠聽聲音和靠嗅覺去完成動作，令牠有求生技能，訓練唔係單純為演嘢！」
踩滑板由上板、推板到向前滑，成個動作一氣呵成。教時要分階段，三部曲指令：up、table和push，教隻狗當塊板係張枱咁向前推。
盲犬神技兩年前，七歲的Nikki眼球組織退化，以致白內障。阿良曾擔心Nikki失明後，會變得意志消沉，「見過好多狗仔盲咗之後，行路撞牆，無晒心機，唔願郁唔想食嘢，好快離開咗。」幸好Nikki平日聽慣阿良聲音指令，又用嗅覺避開障礙物。盲咗兩年，到今日仲可以表演絕技，勁呀！
直立咬花教狗仔咬嘢有竅門，先用手輕輕扶住頸圈位，再將物件靠近狗仔嘴邊，出於本能狗仔會咬實物件，咁就大功告成。
攞棒棒Nikki繑手攞棒棒，動作由俾hand演變過來。
壹寵物信箱貓貓狂甩毛、狗狗吠不停，唔知點算好？請教專家啦！將問題電郵至mailto:nextpet@nextmedia.com，我們將邀請專家為您一一解答！
