曾經同合和太子爺胡文新拍過拖嘅袁彩雲，甩咗拖冇耐識咗加拿大飲食業才俊Anthony（江銘峰），拍拖兩年之後，喺09年嫁咗畀Anthony，結咗婚一年之後，袁彩雲決定淡出娛樂圈，移民去溫哥華同老公努力造人，兼且過吓少奶奶生活，得閒仲返嚟香港探吓老友。
結婚4年後，袁彩雲噚日喺微博宣佈，今夏屋企將添一位新成員。
獲好友祝福
恨B恨到發燒嘅袁彩雲，曾經話過自己同老公兩個都係屬兔，所以好希望可以生番個兔BB，實行屋企有三隻兔仔，但係努力咗一段時間都未有好消息。不過皇天不負有心人，袁彩雲噚日喺facebook同微博擺咗張結婚相，宣佈造人成功，佢話：「今日江生和我踏入絹婚（4周年），同時我們亦非常興奮可以同大家分享，今年夏天我們會有一個新的家庭成員加入啦！」歐陽震華嘅老婆Rosanna、曹永廉同埋陳敏之先後留言恭喜佢，聽袁彩雲嘅老友講，佢會喺5月份返嚟香港，今次仲會留度一段長時間，睇嚟佢應該會喺香港生完BB先走。
from:
http://hk.apple.nextmedia ... 130329/18210638
