今年初，19歲影壇新人吳千語得林峰賜名份，升呢做「峰嫂」，一夜間身價大幅暴漲，近兩個月由1萬元新人價，急升至10萬元起錶。三伴林峰遊埠，盡興而歸的她，上週五(15日)，秘密夥拍張栢芝御用化妝師Rick Chin，為now 102台的新節目《Chin與千尋》錄影。
現場所見，處女下海做主持的吳千語，表現有板有眼，NG亦只是一take起兩take止。對於騷價急升，她坦言想買車獎勵自己，「最緊要考咗車牌先，然後想買架二手歐洲車，貪佢好鋼水！」峰峰收到未？
前年，嫩模出身的吳千語，由鄒世龍打骰的「Starz People」過檔黃百鳴的「天馬娛樂」。她挾住「少女版楊采妮」之名，拍下處女電影《開心魔法》後，始為人識。據知她出道日子尚短，騷價一直徘徊一萬左右，有時甚至只收幾千元車馬費。
買車作獎勵
短短一個月，極速賺咗第一桶金的吳千語，首個目標要買車。
吳千語在adidas做錄影，應導演要求換了多套運動衫，更要即席在舖頭內行cat walk。
飲水當食晏
當日攝製隊要走三個地方，時間緊迫，全日冇嘢落過肚的吳千語，一邊聽導演（左）講解，一邊飲水頂住肚。
10萬起錶價
融化Chok王
33歲「chok王」林峰和吳千語去年因拍《男人如衣服》暗中撻著，不出半年，林峰已罕有賜予BB名份，更出口維護女友，看來千語BB深得峰峰歡心。
直至上月，林峰罕有公開二人戀情，吳千語騷價亦應聲急彈。知情人透露：「其實上年七月，佢同林峰傳緋聞，騷價已經跳到5萬，工作量都幾平穩。年初，林峰確認千語女友身份，好多客貪有noise，都主動搵千語出騷，佢經理人講過試過一日接好多個電話。梗係啦！佢出親嚟都有問必答，點都會提到阿峰一兩句，見報篇幅自然大啲，廣告商梗係搶住用佢。」吳千語騷價高漲，最開心莫過於冷手執熱煎堆嘅黃百鳴，相反舊老闆鄒世龍卻揼心嗌走寶。鄒回應時更酸溜溜說：「……咁證明我哋公司出品必屬佳品！」
跳入電視台做主持
林峰上個月完成個唱後，即與女友由東京、沖繩戀到米蘭，好似見少陣都唔得咁！
近日，now電視亦睇中吳千語人氣急升，邀請她與栢芝御用化妝師Rick Chin主持13集《Chin與千尋》，節目圍繞潮流、飲食與購物，將於4月2日首播。
上週五（15日），本刊獨家直擊她與Rick Chin在尖沙嘴adidas拍攝節目。首次做主持的千語，在導演細心教導下，每個shot都是一兩take搞掂。Rick Chin更主動讚她：「真係好叻女，第一次做主持咁快上手，又識走位，大把前途。」待拍攝完畢後，吳千語坦言為今次節目，花近一個月在網上和食肆蒐集資料：「我之前只係做過飲食節目嘉賓，今次第一次做主持，都做咗好多準備工夫，去餐廳食嘢會問嚇嗰度嘅歷史，又睇嚇邊度有揀手貨買，所以都應付到。」對於最近騷價急升及工作量急增，她尷尬一笑：「我唔知自己幾錢騷價，所有嘢都係公司安排嘅。而我賺錢嘅首個目標係想快啲買架二手車，方便出入。歐洲車夠實用又好鋼水夠安全，都幾好，所以嚟緊會去學車先。」其實有峰峰做司機，千語BB大可安心做乘客。
半年吸金200萬
去年7月，吳千語同林峰密會斷正，雖然當時兩人否認拍拖，吳千語的身價卻急升到5萬一個活動。至今年二月中林峰正式公開承認戀情，千語身價又急升到十萬。短短半年間，19歲的她已穩袋200萬。
巨星嫂有價
升呢做天王嫂有著數，樣辦有熊黛林同樂基兒，她兩人與吳千語同樣是model出身，得男友賜予名份後，除了出騷價錢暴升，更可憑人氣涉足電視和電影，所以不少模特兒視之為上位渠道之一。
樂基兒
08年與黎明在美國拉斯維加斯秘密成婚，人氣急升的她，騷價企硬廿萬。可惜兩人結婚4年，於去年10月宣佈「分手」。自此樂基兒工作量激減，轉以遊山玩水，享受生活為主。
熊黛林
06年來港發展，人氣平平。不過自從搭上郭富城後，身價急升到16萬，近年轉戰拍電影，發展不俗。最近她更由大坑搬到月租3萬多的嘉亨灣居住。
