事隔八年，葉德嫻於三八婦女節（上週五）再踏紅館，舉行一連三「葉德嫻Sing For Me 2013演唱會」；事先聲明無星級嘉賓更無華麗舞台，即使挾住七料影后牌頭，卻無助銷情。開騷前一星期，貴、中、平飛，無一款爆滿，主辦單位為保影后顏面，將三場共近過萬張門票，改成一折特價飛散貨，加埋網上全線半價促銷，首場勉強有九成滿入座率。
Deanie開騷，一而再耍冧說：真係要多謝蝕到眼坦坦嘅主辦單位！
主辦單位推出一折飛，配合網上半價促銷，令首場入座率勉強有九成。
年屆六十五歲的葉德嫻，踎低起身有問題，要由表演嘉賓Anson小朋友出手相助。
劈價散貨
繼○五年三場「葉德嫻星之旅演唱會」，年屆六十五歲的葉德嫻，挾住《桃姐》七料影后餘威，上週五（三月八日）再踏紅館。唔請嘉賓幫口，唯一妥協是去年底破格為無綫拍音樂特輯「得閒講•德嫻唱」，主辦單位大國文化揸fit人何麗全半求半氹，叫影后搵半邊仔劉華做嘉賓救亡，葉德嫻都一口拒絕。
為求填滿座位，好好睇睇，有關方面一口氣將三場，合共過萬的門票改成一折特價飛，散貨填氹。臨開騷前，網上facebook群亦有劈價飛出售，$780賣$450、$580賣$350、$380賣$150，買家以$450買到$780貴價飛，坐到第十三行，票面價顯示$78。
「台下面加位嗰幾行一早俾Breast Cancer Fund（香港乳癌基金會）hold咗做慈善，所以散出街嗰批，啲位都唔會好靚。」一名大國文化的員工透露。
玩埋CY
影后堅持以歌會友，舞台的大小，同黃子華去年在紅館開棟篤笑一樣大。頭場當晚八時許，半邊仔劉華、許志安、雷頌德相繼入場，八時十五分，葉德嫻忽然現身台邊，先同好友、觀眾打招呼，鳴謝各個單位，提到負責髮型的Billy（Sammy御用髮型師）時，抵死地說：「你梳我個頭靚過梳鄭秀文！」
踏正八時半，準時開騷。演唱會零舞蹈員，影后靠口技搭夠，令演唱會氣氛不錯。「今次可能係最後一次，年紀都唔細，隨時走！」「好彩自己dum dum哋，先至拍到部戲（《桃姐》），真係行老運。」
老馬有火，即使特首夫人是座上客，葉德嫻照玩，先問觀眾「嗰個梁生喺唔喺度？」再接着說：「講僭建嗰個，呢啲人真係要搬張床喺街瞓……政府要幫吓啲人，大家唔好怕上街，做呢啲事好正確，唔使驚！」
劉華、許志安、雷頌德和丘凱敏坐埋一齊睇騷，原本大會想安排劉華做嘉賓谷飛，卻被影后一口拒絕。
影后夠格
葉德嫻徹底我行我素！演唱會設中場十五分鐘休息夠晒破格，演唱會期間，唱《輕輕嘆》不滿表現，葉德嫻要求重唱，唱《赤子》前因為高踭鞋著到腳痛，要除鞋赤大腳唱外，encore部分更寸爆：「嚟緊我唱英文歌，唔鍾意，我明白，你哋可以走先！」
最後桃姐上身，葉德嫻失驚無神戴上假髮，扮法國一代歌后Edith Piaf獻唱對方名作，接近凌晨十二時，收檔。
近年長期在內地搵人仔的林保怡專程捧場，葉德嫻特別鳴謝他俾面出現。甚少睇演唱會的許紹雄，拖住囡囡一家三口前來捧葉德嫻。
特首夫人唐青儀前往欣賞，但影后一樣無面俾，當住面叫觀眾有需要就要上街抗議。
