前男子組合Bliss成員Oscar，退出樂壇後拜師學整生煎包，一技傍身學有所成，上個禮拜二（一月二十二日），喺旺角開鋪做老闆，唔少圈中人現身到賀，包括張敬軒、鄭融、謝安琪、張繼聰等，連平日只蒲中環銅鑼灣嘅徐濠縈，亦下凡到旺角。
E神嫂出巡MK，四吋高踭換上波鞋，身邊仲有近期因為陪跑步陪到變老友嘅連詩雅，幫手做貼身跟班。但E神嫂响門口影完相，即刻閃番入鋪搵位坐，之後一眾嘉賓出門口參加拜神切燒豬儀式，佢一樣話之你，繼續專心食生煎包。
提到早排同老公陳奕迅去報業協會投訴傳媒追訪康堤，侵犯兒童私隱，徐濠縈食住生煎包話：「哎呀！我今日唔講呢啲！」記者叫佢企出街影張單人相，佢都十個唔情願。第二日，徐濠縈出席灣仔一個活動，開口力撐曾志偉好人有好報！唔，原來要過番對面海，先至係主場。
旺角人頭湧湧，改著波鞋嘅徐濠縈有連詩雅（戴帽）跟後保護，仲要記者再三要求先肯企門口影張單人相。
嘉賓參與切燒豬賀Oscar，徐濠縈連詩雅唔願郁，留响鋪入面食生煎包。
徐濠縈唔慣落旺角，相反謝安琪、張繼聰兩公婆就自在同圍觀街坊打招呼
張敬軒做埋阿四，經常走入廚房睇包，仲係唯一一位嘉賓裝香拜神，夜晚再喺Instagram洗版幫老友宣傳，好落力！
