林峯將於今個星期踩入紅館開騷，曾揚言於個唱後暫時「收山」的他，為了令「告別作」十全十美，日以繼夜搏命綵排的他要喪食補充能量，避免體力透支在台上暈低！
前所未有咁辛苦的林峯挑戰極限，他笑言：「個人好似冇乜力，忍唔住要嗌牛腩食。」
林峯前晚為今個星期六舉行的「A Time 4 You林峯演唱會」進行綵排，四度在紅館開騷的他曾預言個唱後會暫別舞台，休息一、兩年，故為了給歌迷留下最美「峯」采，近日密密操練，排舞兼練歌，務求以最弗狀態示人。當日在附近錄音的內地女星黃聖依，更特意前來打氣，兩人早前曾合作電影，前晚一見面即雞啄唔斷，認真老友鬼鬼！
喪食牛腩補充能量
林峯透露將在演唱會上大騷舞藝，單單綵排就已經體力透支，他說：「今次演唱會有好多舞要排，排完舞之後夜晚仲要band rehearsal，覺得個人好似冇乜力，忍唔住要嗌牛腩食，要一邊食一邊排。」他更笑言怕會在台上暈低：「呢次係咁多年來，最需要體力嘅一次，（擔心食太多變肥？）如果唔食嘢我驚會喺台上暈低。」
內地女星黃聖依特地現身為林峯打氣
林峯日練夜練，務求令「峯」迷有美好回憶
組合LOLLIPOP F將擔任林峯首場嘉賓
LOLLIPOP F做嘉賓
至於演唱會嘉賓，林峯透露會邀請台灣組合LOLLIPOP F擔任頭場嘉賓：「因為之前喺頒獎禮，同佢哋都幾好傾，加上佢哋又係跳舞組合，我同成員阿緯比較熟，早前喺橫店工作，佢又喺橫店，咪叫佢一齊來玩。」問到是否LOLLIPOP F幫他「啃」了「亞太區最受歡迎男歌星」獎，故「禮尚往來」請他們做嘉賓？林峯耍手說：「我同阿緯一直有保持聯絡，半年前我已經有同公司提議過搵佢哋，我好多跳舞環節，佢哋又跳得，應該會有好多火花。」至於會否邀請緋聞女友吳千語睇騷？林峯坦言有：「所有行內識嘅人都有請。」
From:
http://orientaldaily.on.cc/cnt/e ...0124/00282_042.html
