上週五（14日）第55屆《亞太影展頒獎禮》喺澳門威尼斯人酒店開幕。話晒叫亞太影展，以為場面一定好grand同星光熠熠，FBI都專程搭船過大海睇星。
點知FBI去到，仲以為自己去咗TVB頒獎。事關由上週五嘅記招到週六晚嘅頒獎禮，出席嘅電影界紅星寥寥可數，數得出嘅巨星只有劉青雲同梁家輝，而大部分嘉賓都係TVB姐仔同小生。好彩擔任評審嘅劉嘉玲，無論行紅地氈至頒獎都着住條低V透視晚裝，露出湯碗胸，先至令成個影展有番啲星光。
FBI收到風，原來今次大會嘉賓，好似劉嘉玲、成龍、甚至一班TVB藝員都係靠志偉先請到，而今次志偉除身兼頒獎禮司儀外，仲係大會籌委會執行主席，如果唔係志偉碌爆人情咭，真係驚成個騷變咗萬千星「虧」頒獎禮。
嘉玲照起
上週六（15日），亞太影展頒獎禮前，劉嘉玲着上低V透視晚裝行紅地氈，真空晚裝露出湯碗胸，成為全場焦點。
身兼司儀同大會籌委會執行主席嘅志偉當日親自迎接嘉玲。亞太影展已有58年歷史，現時已有22個亞太國家或城市參與此影展，包括東京、首爾、香港及澳門，但近年多次因經費不足而停辦，今年輪到澳門主辦，可惜號召力不及當年，所以搵星做嘉賓都要搵曾志偉幫手。
劉青雲雖然攞唔到「最佳男主角」獎，但佢有份主演嘅《奪命金》就攞咗「最佳影片」，當晚青雲就代缺席嘅杜琪峯由劉嘉玲手上接過獎項。原來杜琪峯去咗飲小柏林婚宴，真唔畀面！
子珊自摸
志偉同TVB關係良好，一出聲TVB姐仔個個畀面赴會，而一姐徐子珊除谷胸行紅地氈外（右圖），更於頒獎禮跳舞表演助興，仲玩自摸，交足功課。
香香火辣
今年憑TVB《巴不得媽媽》升呢啲新女神岑麗香，亦孖住高鈞賢一齊行紅地氈。香香着紅裙行紅地氈，畫面夠晒火辣。
Bosco頒獎
黃宗澤同謝天華就有份上台頒「最佳攝影獎」，仲搞爛gag話：「𠵱家啲人食嘢，唔係人食先，係相機食先。」由電視小生頒電影幕後獎，感覺騎呢。
