5人女子組合Super Girls中的Cheronna（吳嘉熙），身高164cm，雖是隊中最矮的一個，但勝在有厚實靚聲線，而成隊中的第一主唱。
皮膚黝黑似足加州陽光少女的Cheronna，其實百分百made in香港，更是隊中最sporty的女生，閒時最愛到海灘，原來Cheronna曾是肥妹一名，最勁更有138磅，果然女大18變。
明明在香港出世，但到中六時卻忽然到中山接受強國教育，Cheronna說：「父母做乜我唔想講，中六嗰時媽咪叫我去嘅，佢話嗰邊讀書好啲，咁我去到啲同學又真係勤力啲嘅，可能嗰邊冇乜嘢玩啦，咁我都真係專心咗。」
花名「暴龍」
家陣又瘦又靚女，但Cheronna剛入大學時，原來又肥又厚肉，更慘遭同學改名叫「暴龍」，Cheronna回憶說：「由小學開始，我一直都係肥妹，小學四年級時已經可以一餐食2碗飯，去到大學高峰期更試過138磅，被同學叫做「暴龍」，我自細好鍾意游水，去到F.5開始好鍾意衝浪，所以一路以嚟我都係大隻兼好厚肉。係入咗行後先決心減肥，𠵱家會喺Instagram like咗好多食物相當食咗，當係一種自我安慰啦，哈哈！」
5女感情好
Cheronna話Super Girls其他成員個個有長腿，自己就係最矮嗰個，惟有喺唱功及吉他方面下苦功彌補番。《蘋果日報》圖片
一隊有5女，難免會互相比較，但Cheronna堅持話大家感情超好：「我哋Super Girls 5個女仔大家感情都真係好好，我喺隊中係最男仔頭、最活躍的一個，通常係我帶動氣氛，之前我一直有學唱歌，把聲比較厚實，所以成為第一主唱，早前同林德信拍完套微電影後，對電影好有興趣，好想再試吓拍多啲戲，不過𠵱家目標係同Super Girls成group人一齊努力，可以得到人認同，唔會再話我哋得個樣同長腿啦！」
Cheronna（吳嘉熙）
年齡：23歲
身高：164cm
三圍：32、24、36
學歷：浸會大學公共關係科Year 1（休學中）
興趣：衝浪、游泳
最愛曲風：R&B、Hip Hop
