一年一度，又係台慶晒冷三部曲嘅十一月。邊三部曲，咪就係節目巡禮、台慶夜同萬千星輝頒獎典禮囉。
上星期四（8日），首部曲上演之夜，FBI第一時間入去電視城趁墟，係就係同年年一樣人頭湧湧囉，不過啲卡士差咁遠嘅？陳法拉、胡杏兒、吳卓羲飛咗去英國拍《衝上雲霄2》外景；鄭嘉穎人在強國拍電視劇《葉問》；雖然有林峯chok住撐場，睇完節目巡禮又話要趕住去拍微電影，結果成個停車場咪剩番陳豪、馬國明同楊怡小貓三四隻俾全場廣告客戶圍囉。
係人都知節目巡禮唔係拍畀觀眾睇，係拍畀班廣告客戶拉廣告㗎嘛，所以年年到咗呢晚，花旦小生都要變身男女公關招呼人客。人丁單薄，FBI睇住陳豪同馬明慘被大批女性客戶包圍，寸步難移、笑容僵硬，足足成個鐘原地踏步呀！
人哋有求必應笑容又畀足，好心班貴客就知足啲啦，仲喺度大聲呼叫：「哎吔，林峯去咗邊呀？影唔到林峯呀！」𠵱家陳豪好差咩？
睇完巡禮片，班小生花旦冒住大雨出停車場招呼貴客，全場最受歡迎嘅陳豪俾班女客戶輪住圍，成個鐘都仲企喺原地。年年都係招呼完班客至入場睇片，今年流程倒轉，俾徐子珊繑住嘅林峯撐場撐到播完片，就去咗趕下場。
馬明上位
少咗大班小生花旦撐場，輪到馬國明上位，受歡迎程度僅次陳豪。
2013必煲劇
《好心作怪》女版劉松仁
奇情懸疑時裝劇，周麗淇接棒做女版劉松仁，咀完黃宗澤再咀苗僑偉，肉緊過小丑鼻楊怡。
《巾幗梟雄3》杏兒芳子
胡杏兒取代鄧萃雯，話就話全新角色同故事，但係睇見杏兒扮緊梅姐個川島芳子look，就真係唔多開胃喇！
《情逆三世緣》加埋100歲
息影三年的關詠荷復出夥拍老拍檔歐陽震華，不過48歲荷姐加埋52歲Bobby剛好100歲，會唔會老咗啲？
《傳愛事務所》談情官司
力邀《男親女愛》監製徐正康回巢創作，陳豪、陳法拉同黎耀祥喺法庭打打官司談談情。
