媽咪姐同好多「七十後」一樣，將鄭伊健、陳小春嘅《古惑仔》系列全部煲到滾瓜爛熟，想當年黎姿扮黐脷筋嘅「細細粒」好鬼悲情！但依家已經生咗3個，做少奶奶咯。
估唔到16年後嘅今日會重拍《古惑仔》，媽咪姐最關心邊個做陳浩南呢個角色，話晒伊健個長髮look咁入型入格！結果依家搵咗羅仲謙擔大旗做陳浩南，應該貪佢有兩嚿胸肌夠man啦。梁烈唯就做「山雞」，由林子善做「包皮」。
周二晚（16日）《新古惑仔》係旺角拍外景，主要角色都喺晒度，新浩南哥仲出力sell新戲：「我哋會用全新故事同埋全新角色，因為年代唔同咗，以前古惑仔用call機『吹雞』，依家就用what's app，對白亦會有粗口，感覺接近現實好多，劈友把刀仲係堅嘢。」
新浩南哥咁落力，媽咪姐唔捧場都唔得啦！
要叫唯唯過兩招先掂
練開功夫嘅梁烈唯就打得搏命，埋身肉搏完全唔錫身，而羅仲謙只係喺後面觀戰，唔通怕俾「好朋友」楊怡嫌棄？
那些年嘅《古惑仔》確係一時經典，依家陳小春、林曉峰、謝天華同朱永棠都結晒婚，連無腳雀仔鄭伊健下年都娶蒙嘉慧
林子善呢個「包皮」造型冇乜江湖味，佢仲話：「食糖多過食煙，搞到愈來愈肥。哈哈，不過角色需要啫！」果然專業喎！
