藝人都係同普通人一樣對着數嘢特別敏感，所以近日連鎖時裝店I.T提供半價購物優惠畀藝人時，就吸引到好多人幫襯，前日仲先後有三對藝人情侶加埋容祖兒去，再一次證實文詠珊（Janice Man）同肥仔男朋友李冠峰假分手。
拍拖任影
前日4點幾見到JM戴住墨鏡喺銅鑼灣百德新街間I.T店行出嚟，佢一見記者就開始不停講電話，突然間佢嘅肥仔男朋友就閃過，講緊電話仲攞住個I.T袋，佢極速行咗去泊喺街邊自己架黑色Audi度，JM就慢慢行去會合男朋友，同行嘅仲有一位男友人。記者問JM係咪放假同男朋友行街，佢就話夜晚仲有嘢做喎。
梁烈唯大方
其實之前新一代山雞梁烈唯都拖女朋友喺呢間店買嘢，仲好大方搭住女朋友膊頭任影。
跟住到夜啲喺希慎道嘅分店，見到容祖兒同助手喺度買衫，前前後後買咗成四袋先至肯收手，唔知係咪因為太多戰利品，祖兒最後仲叫司機將架車停喺雙黃線，方便佢上落，唔使行咁遠。
事隔冇耐，模Phoebe（許穎）亦都同個男仔喺度出現，不過兩個人就行到好避忌，離行離列咁，但肯定前日係Phoebe嘅購物日，因為除咗I.T袋之外，佢仲攞住個Chanel紙袋㖭，睇嚟收穫好豐富。
