美牌Abercrombie& Fitch最近喺中環開咗間旗艦店，以前FBI耐唔耐去美國都會幫襯吓，香港開分店當然要去一。
衞蘭自從上年同Roger分手後就落晒形，FBI最近喺街撞見佢，發現佢眼袋勁大及身形浮腫，睇嚟佢仍未走出分手陰霾。
上星期六晚FBI專登去咗A&F一轉，入去行咗一個圈就見到一位靚仔sales哥哥好熟面口，原來係衞蘭前男友Roger。FBI見到佢都幾勤力，除咗會同客人傾偈了解客人需要，氹到女客人鬼咁開心，亦偶爾會摺吓衫。之前有朋友同FBI講香港A&F嘅服務麻麻，夠鐘關門就唔畀人試衫趕人走，好彩仲有Roger咁殷勤。
之後FBI都打過畀衞蘭所屬嘅Amusic高層王凱文八吓，佢話衞蘭都唔清楚Roger去咗A&F做，因為大家分手後都冇乜聯絡咁話。FBI建議衞蘭下次「濕平」，記得去A&F喇！
中環Abercrombie& Fitch喺開幕前搵「sales探」四圍喺中環、銅鑼灣等街頭搵靚仔靚女去casting售貨員；亦喺海外請咗一班大隻模助陣畀港女任影。係就係有綽頭，但FBI就聽聞佢哋服務麻麻，大部分sales都冇Roger咁殷勤。
