祖兒和杜汶澤（左）為新片四出宣傳，前晚拉隊到澳門出席首映禮。
樂壇天后容祖兒曾被指是票房毒藥，最近擔正演出的《DIVA華麗之後》可算是力求翻身之作。除香港首映外，前晚移師到澳門進行宣傳，祖兒呼籲鍾意她的人要每人看十次，而網上更進行大促銷，差不多以半價發售門票，希望可以省靚招牌。
容祖兒在樂壇上獲獎無數，可惜拍電影卻處處碰壁，演出過的《身驕肉貴》、《神經俠侶》、《翡翠明珠》等都票房麻麻，最近由老闆楊受成的英皇娛樂投資，為祖兒度身訂做角色，講述娛樂圈的辛酸史，讓她可以演回自己，有望成為代表作。為保證有預期票房成績，昨日網上已發現有團購飛促銷，由原價$70一張戲票，可以在網上以優惠價$76兩張發售，比原價平了近一半。
祖兒的新戲還未上映，但已在網上割價促銷。
首映緊張胃痛前晚祖兒率領一班演員杜汶澤、冼色麗、陳家樂及導演麥曦茵等到澳門出席《DIVA華麗之後》首映禮，並展出祖兒於過往演唱會中穿戴過的華麗服飾。祖兒形容《DIVA》像是懷胎十月的作品：「今次係第一次擔正，之前出席香港首映時緊張到胃痛。呢部電影每一幕都令我有好深感受，估唔到會攞番我咁多過去演唱會嘅片段，勾起好多回憶。」
新片《DIVA》為祖兒度身訂做，她開心與胡歌和冼色麗一齊打手印。
阿澤影射Mani祖兒透露媽媽和弟弟看完電影後都有好高評價，她說：「媽咪話我進步咗，細佬睇完仲寫咗啲嘢，話原來娛樂圈有咁多辛酸史，聽到佢咁體諒我都好感動。」祖兒呼籲愛她的人要多睇幾次：「如果鍾意我嘅要睇十次。」男友劉浩龍（師兄）是否都需要？祖兒撒嬌說：「哎呀，我叫啲fans之嘛。」下周一是師兄的生日，祖兒表示要為電影到佛山及東莞宣傳，無暇慶祝，問會否親自下廚補數？她說：「吓，我煮？咁要學吓先喎，我都唔叻。」
杜汶澤在戲中飾演的經理人被指影射霍汶希（Mani），阿澤笑說：「Mani睇完話我影射佢，我咪話佢點止呀？份人仲差啲。」問到有否請劉浩龍出席？他說：「所有演員都請，但佢家拍劇做男主角好忙，其實有唔少導演都讚佢演技好，可以做儍強接班人。」
